VOV4.Sêdang - Kong pơlê Dak Nông nôkố ai vâ chê 11 rơpâu ha pêt kơchâi, plâi, pôm, plâi kâ tŭm túa, ƀă tâi tâng dâng 176 rơpâu tâ̆n. Tiô xêo dêi kơvâ ngăn ‘na chiâk deăng kong pơlê tối sap ing kố troh khế 11 ai dâng 43 rơpâu tâ̆n kơchâi drêh, pôm, plâi sâu riêng ƀă plâi ƀơr dêi vâi krâ kal tê, mơni dâng 900 tâ̆n rêm hâi. Laga tơdjâk dêi pơreăng COVID-19 xua mê tơdroăng tê tơmeăm pêi lo ing chiâk deăng dêi vâi krâ trâm hên pá puât.

Lối 4 rơpâu tâ̆n plâi sầu riêng kuăn pơlê hiăng châ Khu ngăn 'na chiâk deăng tăng tíu ki vâ tê mơdró

Hên rơpŏng ki ai plâi tá hâi tăng châ tíu tê tơmeăm pêi lo ing chiâk deăng, mâu ngế ki lăm krí xuân tá hâi ai. Kơ koan xiâm pơkuâ mơnhông mơdêk pêi chiâk deăng kong pơlê Dak Nông tối ăm ‘nâi, nôkố kơvâ pêi chiâk deăng kong pơlê Dak Nông hiăng mơjiâng tôh tŏng kum, tơdjêp kum kuăn pơlê tê mâu tơmeăm pêi lo ing chiâk deăng dêi kong pơlê.

Pơtối mê, lối 3 măng tĭng kố lối 4.000 tâ̆n kơchâi drêh, plâi, pôm tŭm túa, 4 rơpâu tâ̆n plâi sâu riêng ƀă lối 3 rơpâu tâ̆n plâi ƀơr hiăng châ kơvâ pêi chiâk deăng kong pơlê tơrŭm tê mơdró.

A Sa Ly tơplôu ƀă tơbleăng