VOV4.Xơ Đăng - Troh nôkố, lâp kong pơlê Dak Nông hiăng mơjiâng châ 230 khu tơrŭm cheăng, ƀă lối 18.000 ngế tơrŭm cheăng. Tiô mơnhên dêi Vi ƀan kong pơlê Dak Nông, mâu khu tơrŭm cheăng hiăng pơ’lêh troăng pêi cheăng tiô Luât tơrŭm cheăng 2012 pơrá ai troăng pơ’lêh nếo, rế hía rế po rơdâ ƀă mơnhông mơdêk, kum pơ’lêh ngiâ méa thôn pơlê. Hơnăm 2021, pêi lo liăn tơdâng dêi mâu khu tơrŭm cheăng a Dak Nông châ vâ chê 1,5 rơtal liăn, tăng cheăng pêi đi đo ăm vâ chê 4.000 ngế pêi cheăng ƀă kơlo pêi lo liăn 70 rơtuh liăn/môi ngế.

Tiêu dêi khu tơrŭm cheăng Hoàng Nguyên kong pơlê Dak Song rêm hơnăm tê ngi châu Âu hrĭng tâ̆n

Ki rơhêng vâ tối tung kơvâ pêi chiâk deăng, mâu khu tơrŭm cheăng dế cho ki xiâm tung pơkâ troăng pêi mơjiâng mâu kơpong pêi chiâk deăng xúa kơmăi kơmok dêi kong pơlê, tơrŭm kuăn pơlê pêi chiâk deăng tiô troăng ki kơnâ. Kong pơlê hiăng mơjiâng 8 kơpong pêi chiâk deăng xúa kơmăi kơmok rơxông nếo; hiăng ai 12 tơmeăm dêi mâu khu tơrŭm cheăng châ pơkâ 3 – 4 hơlŏng tung tơdroăng rêm cheăm môi tơmeăm (OCOP), châ tê ngi kong têa ki pá má môi môi tiah châu Âu.

            A Sa Ly tơplôu ƀă tơbleăng