VOV4.Sêdang - Khu ki ai tơdjâk troh kong pơlê Dak Nông hiăng mơdât môi to hngêi trung hriâm ƀă hên tíu ki ai tơdjâk a tơring Dak Rlâp, klêi kơ’nâi châ ‘nâi ai môi ngế hok tro yương tĭnh ƀă virus SARS-CoV-2. Tơdrêng amê, kơvâ ngăn pơkeăng ƀă khăm pơlât hiăng rĕng xo têa môh séa ngăn vâ rĕng ‘nâi, ăm ối krê F0 lo ing pơlê pơla. Tiô tối tơbleăng dêi Khu hbrâ mơdât pơreăng kong pơlê Dak Nông, klêi kơ’nâi châ ‘nâi ai môi ngế hok tro tung hngêi trung Hdroâng kuăn ngo ai tíu kâ koi, ối pơtê tơring Dak Rlâp, a ƀon Bù Bir, cheăm Quảng Tín, tơring Dak Rlâp yương tĭnh ƀă SARS-CoV-2, khu ki ai tơdjâk hiăng hdró kơpong ki ai ngế tâ pơreăng, séa ngăn tí tăng, tôe xo têa môh séa ngăn pơreăng.

Nôkố, kơvâ ngăn pơkeăng ƀă khăm pơlât hiăng tí tăng châ lối 150 ngế F1, lối 100 F2 ƀă nôkố hiăng ai 15 ngế klêi kơ’nâi séa ngăn RT-PCR yương tĭnh ƀă virus SARS- CoV-2. Vi ƀan hnê ngăn tơring Dak Rlâp pơkâ xúa tơdroăng klâ ối krê tiô pơkâ 16 ƀă tâi tâng tơnêi tơníu dêi cheăm Quảng Tín.

Katarina Nga tơplôu ƀă tơbleăng