VOV4.Sêdang - Kơtăng tơkŭm hnê mơhno, tah lôi pá puât, bu lối 1 khế, kong pơlê Dak Nông hiăng thâ rĕng mơ’no liăn mơjiâng pro tơmeăm tơnêi têa, châ kơlo vâ chê 70%, hên tâ kơlo tơdâng tơdjuôm dêi lâp tơnêi têa. Xêo troh khế 10, kong pơlê Dak Nông hiăng mơ’no liăn mơjiâng tơmeăm tơnêi têa 1.500 rơtal liăn, châ 70% kơxô̆ liăn châ pơcháu hơnăm 2021. Ki rơhêng vâ tối cho nếo hdrối mê môi khế, a hâi lơ 25/8, kong pơlê mơ’no liăn ngân tá hâi châ 40%.

Khu kăn Vi ƀan hnê ngăn kong pơlê Dak Nông lăm séa ngăn 'na tơdroăng cheăng a Gia Nghiã

Tơdroăng ‘’thâ rĕng’’ tung tơdroăng mơjiâng pro, xing xoăng liăn ngân ăm mâu tơmeăm mơ’no liăn ngân tơnêi têa cho kơnôm mâu hnê mơhno tơtro, kơtăng dêi khu râ kăn pơkuâ kong pơlê. Vi ƀan kong pơlê Dak Nông, tối ăm ‘nâi, nôkố kong pơlê dế pơtối séa ngăn, pơtroh kơxô̆ liăn ing mâu tơdroăng tơkêa bro ai kơxô̆ liăn mơ’no iâ ăm mâu tơdroăng tơkêa bro ki kal tơ’nôm kơxô̆ liăn; séa ngăn, tah lôi mâu tơdroăng tơvâ tơvân, mơhnhôk mâu khu mơ’no liăn cheăng, mâu tơring hbrâ pêi drêng kong prâi tơ’lêi hlâu mâu khế mơ’nui hơnăm vâ rĕng mơjiâng pro kêi tơmeăm khoăng.

A Sa Ly tơplôu ƀă tơbleăng