VOV4.Sêdang - Tro klăng a hơnăm hriâm nếo, lơ 5/9 pơla hdrối kố nah, kơ koan khu râ dêi kong pơlê Dak Nông hiăng hlo ai 1 ngế hok tro tâ pơreăng COVID-19, Khu ngăn ‘na hriâm ƀă hnê mơjiâng tuăn ngôa rơkê hiăng pơtê tơdroăng tơkŭm hnê hriâm a mâu hngêi trung. Krê a mâu Hngêi trung Kuăn ngo ai tíu kâ koi ối pơtê tơkŭm ăm mâu vâi hok tro ối a hngêi trung ƀă pơkuâ ngăn kơtăng hok tro. A tơring Dak Rlâp, pơla hdrối kố nah, khu kăn pơkuâ ƀă mâu khu râ kơvâ cheăng hiăng ai hên tơdroăng cheăng ki tŏng kum, mơhnhôk hok tro ƀă mâu thái cô tung kơpong tâ pơreăng.

Klêi kơ’nâi châ trâm hlo ai môi ngế hok tro yương tĭnh virus SARS CoV-2 a hâi lơ 5/9, lối 220 ngế hok tro ƀă thái cô Hngêi trung Kuăn ngo ai tíu kâ koi ối pơtê tơring Dak Rlâp, kong pơlê Dak Nông hiăng ăm klâ ối krê tung hngêi trung vâ hbrâ, mơdât pơreăng COVID-19. Pôa Nguyễn Văn Nam, Kăn pơkuâ ngăn Hngêi trung phôh thong Kuăn ngo ai tíu kâ koi ối pơtê râ má 2 ƀă Hngêi trung râ má pái phôh thong tơring Dak Rlâp, kong pơlê Dak Nông tối ăm ‘nâi, rêm hâi, hngêi trung pơrá tơrŭm cheăng ƀă kơvâ ngăn ‘na pơkeăng ƀă khăm pơlât khăm ngăn ƀă tối pơtâng rĕng ‘na ivá châ chăn dêi mâu hok tro ƀă thái cô.

‘’Peăng khu kăn ƀô̆, mơngế pêi cheăng tung hngêi trung, tíu kâ, tíu ối hngêi trung hiăng ăm ối tung mâu kơbong pêi cheăng ƀă hngêi ki hnê hriâm ăm mâu thái cô.Ƀă mâu hok tro ăm vâi ối tơniăn tung kơbong, ai 27 to lâm, ai on tơhrik, têa, tíu hum, bâu, jíu, tíu mơdrah xuân ai tŭm. Tơdroăng ki hmê kơchâi ăm vâi hok tro mê ngăn tiô kơ liăn hriâm, xuân môi tiah drêng ôh tá ai pơreăng, xuân tơ’mô tiah mê.

Pơcháu cheăng ăm mâu thái cô ki pơkuâ ngăn lâm mê hngêi trung xuân hnê tối vâ mâu nôu pâ, hok tro hlê plĕng ƀă hmiân tuăn. Tung hngêi trung kố pơrá tŏng kum tŭm têk ing ôu kâ, rak vế krúa lĕm châ chăn, ivá, xếo pơkeăng, khăm ngăn châ chăn, tâng ai tơdroăng ki tơviah mê hngêi trung kô tơrŭm ƀă Tíu xiâm vâ rak ngăn ivá châ chăn ăm vâi o hok tro’’.

Mâu hngêi trung hriâm a Dak Nông pơtê pơtân hnê ƀă hriâm tung hngêi trung

Klêi kơ’nâi châ hlo hok tro tâ pơreăng COVID-19, kong pơlê Dak Nông hiăng pơtê pơtân tơdroăng hnê hriâm a tâi tâng mâu hngêi trung. Khu pơkuâ ngăn ‘na hnê hriâm ƀă hnê mơjiâng tuăn ngôa rơkê kong pơlê Dak Nông hiăng pơkâ thế tâi tâng mâu khu râ hriâm, sap ing râ má môi, râ má péa, râ má pái, giáo dục thường xuyên ƀă mâu hngêi trung ki ê tung lâp kong pơlê pơtê pơtân tơdroăng hnê hriâm a mâu hngêi trung, ôh tá hnê hok tro sap ing hâi lơ 7/9 tá troh ai tơdroăng pơtâng tối ki nếo.

Ƀă mâu Hngêi trung Kuăn ngo ai tíu kâ koi ối pơtê mâu tơring ƀă Hngêi trung râ má pái phôh thong kuăn ngo ai tíu kâ koi ối pơtê N’Trang Lơng hiăng ăm mâu vâi o ối hlối tung hngêi trung ƀă athế pơkuâ ngăn kơtăng hok tro. Ƀă Hngêi trung râ má pái phôh thong chuyên Nguyễn Chí Thanh ăm kơxô̆ hok tro ki kâ koi ối pơtê tung hngêi trung prếo vêh dêi ngi hngêi ƀă pơkâ thế mâu vâi o rak vế, pêi pro kơtăng khât tơdroăng hbrâ, tơplâ, mơdât pơreăng tiô pơkâ.

Khu hnê hriâm ƀă hnê mơjiâng tuăn ngôa rơkê kong pơlê Dak Nông hiăng pơkâ thế mâu khu râ hnê hriâm rak vế tro tiô mâu troăng hơlâ ki hbrâ, tơplâ, mơdât pơreăng. Mâu hngêi trung ngăn tiô kơ tơdroăng ki dah ai xêh kế tơmeăm, ai hngêi trung ki ‘nâ po hnê hriâm online, pơcháu mâu ƀai tâp, pơcháu mâu ƀai ki mê tung khu tiô kơ Facebook lơ Zalo vâ kum ăm hok tro hriâm, rơbot tiô kơ tơdroăng ki tơtro, tơ’lêi hlâu.

Kơvâ hnê hriâm thâ rĕng tơrŭm cheăng ƀă kơvâ ngăn ‘na pơkeăng ƀă khăm pơlât hnê hok tro, kăn ƀô̆, thái cô ƀă mâu vâi o hok tro kâi tơkâ luâ hneăng ki tro tâ tú pơreăng kố. Ki rơhêng vâ tối, ƀă mâu hok tro ki tro tâ pơreăng F0, kơnôm châ tŏng kum, mơhnhôk mâu vâi o hmiân tuăn, tơniăn tơdroăng tơmiât, athế rak vế, pêi pro lĕm tro tơdroăng hbrâ, tơplâ mơdât pơreăng.

Pôa Nguyễn Văn Toàn, Kăn pơkuâ ngăn Hnê hriâm ƀă Hnê mơjiâng tuăn ngôa rơkê kong pơlê Dak Nông xuân pói rơhêng vâ mâu thái cô ƀă mâu vâi o hok tro kơdo mơ-eăm rak vế dêi ivá châ chăn, pêi pro tro khât mâu tơdroăng pơkâ thế hbrâ mơdât pơreăng vâ rĕng châ po hneăng hnê hriâm a la ngiâ.

‘’Dế nôkố, Khu ngăn ‘na hnê hriâm ƀă hnê mơjiâng tuăn ngôa rơkê hiăng krếo phôn, tơpui tơno, mơhnhôk mâu thái cô hmiân tuăn ối a hgêi trung xua vâ rak vế dêi châ chăn tơná ƀă mâu vâi o hok tro. Mâu thái cô ki pơkuâ ngăn lâm athế tí tăng êng mơnhên mâu vâi o ƀă phôn, tối tơno ăm nôu pâ vâi ‘nâi, kuăn ‘nĕng vâi ối tung hngêi trung kố. Khu ngăn ‘na hnê hriâm ƀă hnê mơjiâng tuăn ngôa rơkê xuân hiăng pơkâ thế mâu khu thái cô ki pơkuâ Hngêi trung athế pơkuâ hnê tối mâu vâi o vâ pôi tá ăm ai tơdroăng tâ tú dêi pó tung hngêi trung’’.

Tung dế Hngêi trung Kuăn ngo ai tíu kâ koi ối pơtê tơring Dak Rlâp

Klêi kơ’nâi châ hlo ai khu ki hên tâ tú virus SARS CoV-2 tung pơlê pơla ing môi ngế hok tro a cheăm Quảng Tín, tơring Dak Rlâp, jâ Tôn Thị Ngọc Hạnh, Kăn xiâm phŏ hnê ngăn Vi ƀan kong pơlê Dak Nông hiăng kĭ pơkâ mâu tơdroăng cheăng ki hbrâ, tơplâ, mơdât pơreăng COVID-19 tung kong pơlê kố. Tiah mê, kong pơlê Dak Nông hiăng pơkâ kô mơdât prôk lăm tung tâi tâng tơring Dak Rlâp sap ing 12 chôu hâi lơ 7 khế 9 ƀă pơkâ pêi pro kơtăng tiô tơdroăng pơkâ 16.

Jâ Võ Thị Kiều Linh, Kăn phŏ hnê ngăn Vi ƀan tơring Dak Rlâp tối tiah kố, klêi kơ’nâi kong pơlê pơkâ thế rak vế, pêi pro tơdroăng 16, tơring hiăng ai troăng hơlâ ki hbru kum phái, kế kâ ăm kuăn pơlê, pơtroh ăm Khu ki hbrâ, tơplâ mơdât COVID-19 tung pơlê pơla. Mâu ngế ki mê kô lăm xing xoăng phái, kế kâ troh tơrêm rơpŏng, khu pơkuâ ngăn tíu pêi cheăng, tung mê ai lối 220 ngế thái cô, hok tro vâ rêm ngế tơniăn tuăn ‘’ngế ki ối ulâi athế ối tơniăn a tíu mê’’.

‘’Ngin hiăng pâ thế Khu hnê mơhno ‘na hbrâ, tơplâ, mơdât pơreăng dêi cheăm, dêi tơring athế rak vế tơniăn ôh tá lôi vâi krâ - nhŏng o kơklêa, ôh tá ai kế kâ tung pơla ai pơreăng. Ngin xo mâu tơmeăm khoăng ki hiăng kơdĭng, tâng vâi krâ - nhŏng o ôh tá ai hmê kơchâi kâ mê ahdrối tâ kơ xing xoăng ăm vâi phái ƀă xup kơxŏng khăm ăm mâu rơpŏng ƀă pơtối séa ngăn nhên mâu rơpŏng ki kơtiê, vâ chê kơtiê, rơpŏng ki ai hnoăng vâ tŏng kum, ôh tá ăm kuăn pơlê tro kơklêa’’.

Khu pơkuâ ngăn vâi kơdrâi tơring Dak Rlâp hiăng pơkâ pro tiô túa ‘’shiper 0 liăn’’ lăm kơchơ kum ăm kuăn pơlê, vâ kuăn pơlê hmiân tuăn ối a hngêi hbrâ mơdât pơreăng. Khu kố hiăng mơjiâng 110 khu ki lăm kơchơ ai vâ chê 700 ngế a mâu thôn, pơlê, tôh kơphô̆. Rêm hâi, mâu khu ‘’shiper 0 liăn’’ kố kô lăm xo inâi tơmeăm vâ lăm kơchơ teăng ăm mâu rơpŏng tung pơlê. Drêng pơcháu tơmeăm mâu ngế ki mê ôh tá trâm ối achê ƀă vâi krâ-nhŏng o mê ối a hơngế ing bo cheăng vâ kơ tơniăn tơdroăng ki hbrâ mơdât pơreăng. Túa pêi pro kố kô châ Khu pơkuâ ngăn vâi kơdrâi tơring Dak Rlâp pơtối rak vế tung pơla klâ ối kơtăn tung pơlê pơla tiô tơdroăng 16.

VOV Tây Nguyên

Nhat Lisa tơplôu ƀă tơbleăng