VOV4.Sêdang -Hơnăm hriâm 2021 – 2022, vâ tŏng kum mâu hok tro pá puât troh hngêi trung, kơvâ hnê hriâm kong pơlê Dak Nông hiăng pêi pro tơdroăng xing xoăng mơ-éa hriâm, mơ-éa chêh ƀă tŏng kum kơxô̆ liăn hriâm tâp ăm lối 22 rơpâu ngế hok tro mâu râ. Pơtối mê, hơnăm hriâm 2021 – 2022 kong pơlê Dak Nông ai 22.400 ngế hok tro hdroâng kuăn ngo ối tung rơpŏng kơtiê, vâ chê kơtiê châ xing xoăng ăm kơxop mơ-éa hriâm, mơ-eá chêh tê kơtê; tung mê, ai 14.300 ngế hok tro râ má môi, lối 6.900 ngế hok tro râ má péa ƀă 1.200 ngế hok tro râ má pái phôh thong.

Ki nhên, rêm ngế vâi o kô châ tơdah kơxop mơ-éa hriâm ƀă mơ-éa chêh sap ing 14 troh 24 kơxop, tiô a mâu râ hriâm. Tâi tâng kơxô̆ liăn pêi pro cho vâ chê 11 rơtal liăn, ing kơxô̆ liăn ngân dêi kong pơlê. Rơtế amê, kong pơlê Dak Nông xuân hiăng kơbông krếo, mơhnhôk mâu khu pú hên, ngế krê rơtế kuăn pơlê tung kong pơlê veăng tơlo kơxô̆ liăn rôe kơxop mơ-éa hriâm, mơ-éa chêh, hmân ếo vâ tŏng kum mâu hok tro ai tơdroăng rêh ối pá puât, hok tro kuăn tê nôu pâ châ troh a hngêi trung hriâm tâp.

A Sa Ly tơplôu ƀă tơbleăng