VOV4.Sêdang - Kơxo lơ 5/10,a Hà Nội, Hô̆i đong Đô̆i Tơnêi têa tơrŭm ƀă Tíu xiâm ngăn Sinh viên Việt Nam ƀă Kŏng ti tơlo liăn Grup pơkuâ Thiên Long tơkŭm po tơdroăng “Diâp kế tơmeăm hriâm – tŏng tuăn ngoâ rơkê” hơnăm 2021 vâ kum hok tro, sinh viên tro tơdjâk xua pơreăng ai tŭm kế tơmeăm vâ hriâm pâ. Tơdroăng kố châ tơbleăng a mâu kong pơlê, pơlê kong kân pêi pro klâ ối krê pơlê pơla ƀă mâu kong pơlê, pơlê kong kân tro tơdjâk xua pơreăng COVID-19, hnê mơhno hok tro, sinh viên cho kuăn ‘nĕng rơpŏng kơtiê; kuăn muăn hdroâng kuăn ngo, kuăn muăn mâu kŏng nhân dế pêi cheăng a mâu kơpong tíu ki pêi cheăng ƀă kơmăi kơmok; ƀă kuăn muăn kăn ƀô̆ lêng, ƀok thái pơkeăng, mâu khu ki cheăng hbrâ mơdât pơreăng ai tơdroăng rêh ối xơpá.

Sap ing nôkố troh mơ’nui hơnăm, Tơdroăng “Diâp kế tơmeăm hriâm – Tŏng kum tuăn ngoâ rơkê” kô diâp lối 8 rơpâu hnoăng tơmeăm xúa tung hriâm tâp ƀă kế tơmeăm xah hêi, rơkê plĕng, 650 hnoăng liăn hriâm rơkê ăm hok tro râ má 1, má 2; 200 hnoăng tơmeăm liăn hriâm rơkê ăm sinh viên kơtiê; 20 rơpâu hnoăng hriâm ăm hok tro kơtiê, xơpá kơpong hngế hngo hneăng hơnăm 2021 -  2025.

Katarina Nga  tơplôu ƀă tơbleăng