VOV4.Sêdang - Drêng troh Têt Trung Thu, kơxo lơ 20/9, Tiú xiâm Đoân droh rơtăm Kŏng sản Hồ Chí Minh, Tíu xiâm Khu tơrŭm ngăn mâu droh rơtăm Việt Nam ƀă Tíu xiâm Khu ngăn Thái pơkeăng hơnăm ối nếo Việt Nam diâp ăm Khu pơkuâ ngăn Đoân droh rơtăm Hà Nội ƀă Khu ngăn ƀok thái pơkeăng hơnăm ối nếo Hà Nội 1 rơpâu 500 to kơƀăn trung thu vâ pơtroh ăm mâu ngế ngăn pơkeăng, ƀok thái pơkeăng dế pêi cheăng plâ mơdât pơreăng ƀă 100 ‘’Tơdrong pơkeăng F0’’, ăm tơdroăng cheăng pơlât mâu ngế tâ pơreăng a Hà Nội.

Sap hâi lơ 12/9 troh lơ 20/9, mâu kăn ƀô̆ tíu xiâm Đoân droh rơtăm Kŏng sản Hồ Chí Minh, Tíu xiâm ngăn khu droh rơtăm Việt Nam ƀă mâu ngế lăm pleăng hnoăng cheăng tơná hiăng pro 12 rơpâu to kơƀăn trung thu vâ diâp ăm mâu ngế cheăng khăm pơlât, ƀok thái pơkeăng ki ối a xiâm plâ mơdât pơreăng a mâu kong pơlê. Ki tơxâng vâ tối, tung tơdế măng tĭng hdrối kố nah a Pơlê kong kân Hồ Chí Minh, Tíu xiâm ngăn khu ƀok thái pơkeăng hơnăm ối nếo Việt Nam pơtối diâp ăm 3.000 ‘’tơdrong pơkeăng F0’’ ƀă kơƀăn trung thu ăm mâu ngế tâ COVHID-19 ki dế pơlât a hngêi, kơnâ vâ chê 800 rơpâu liăn/tơdrong.

Tíu xiâm Ngăn Khu thái pơkeăng hơnăm ối nếo Việt Nam xuân pơtối kum ăm 50 ngế cheăng ngăn pơkeăng pơlât mâu ngế tamo, mâu ƀok thái pơkeăng plâ mơdât pơreăng ki kơhnâ rơkê, ki kơtiê xơpá, rêm ngế 10 rơtuh liăn, tung mê Hà Nội ai 10 ngế ngăn pơkeăng, ƀok thái pơkeăng.

Gương tơplôu ƀă tơbleăng