VOV4.Xơ Đăng - A Hà Nội, Khu xiâm pơkuâ tơdroăng loi tĭng tiô khôp nếo tơrŭm ƀă mâu kơ koan ki tơdjâk tơkŭm po Leh diâp pri roh tơ’noăng ti tăng plĕng ‘na tơkăng kong tơnêi têa ƀă dó inâi ‘’Tơkăng kong tơnêi têa á’’. Roh tơ’noăng mơ’no tơdrêng tung um tiô troăng măng Internet ti tăng plĕng ‘na ‘’Tơkăng kong tơnêi têa á’’ vâ pơtâng tối, mơnhên troăng pơkâ pêi, troăng hơlâ ki tro dêi Đảng, Tơnêi têa ƀă mâu tơdroăng mơ-eăm dêi mâu bêng, tơring tung tơdroăng pêi pro Troăng pêi ton xŏn gak kring tơkăng kong tơnêi têa, pêi pro Pơkâ Hneăng hôp roh má 13 dêi Đảng.

Tơdrêng amê, kum mơnhông hiâm mơno pâ nhuô̆m tơnêi têa, tơdroăng ki phiu ro, nhuô̆m hdroâng mơngế; hnê hriâm mơdêk hnoăng mơjiâng ƀă gak kring tơnêi têa tung rơxông nếo. Mơhé kố cho roh apoăng châ tơkŭm po laga bu tung môi pơla, roh tơ’noăng hiăng mơhnhôk tơdroăng ki veăng ƀă môi tuăn dêi 1 rơtuh ngế ki veăng ƀă lối 2 rơtuh roh veăng tơ’noăng ƀă tâi tâng mâu râ kuăn pơlê veăng, hên ‘na hơnăm ƀă hdroâng mơngế. Khu tơkŭm po hiăng diâp 1 pri ki má môi, 1 pri má môi, môi pri má péa, môi pri má pái ƀă 2 pri mơhnhôk ăm mâu khu ki tơ’noăng rơkê má môi.

A Sa Ly tơplôu ƀă tơbleăng