VOV4.Xơ Đăng - Hâi lơ 25/11,Khu pơkuâ hnê ngăn Đảng kong pơlê Dak Lak hiăng tơkŭm po Leh mơgêi Diâp pri Hlá tơbeăng ‘na mơjiâng Đảng kong pơlê Dak Lak rôh má 3, hơnăm 2021 ƀă Tơbleăng Pri Hlá tơbeăng ‘na mơjiâng Đảng kong pơlê Dak Lak rôh má 4 hơnăm 2022. Klêi lối 8 khế tơbleăng, Khu tơkŭm po hiăng tơdah xo vâ chê 130 hlá tơbeăng a 4 tơdroăng: hlá tơbeăng in, hlá tơbeăng điê̆n tưh, um tơvi, tơpui tung rơ’jiu.

Khu tơkŭm po diâp ƀâng khĕn kơdeăn ăm mâu ngế ki chêh hlá tơbeăng ki châ kâ pri

Ki hên mâu ƀai ki mê hiăng châ pro rơkê, ai tơdroăng ki tí tăng, tối ‘na hnoăng cheăng mơjiâng Đảng dêi kong pơlê Dak Lak. Khu tơkŭm po hiăng diâp 2 pri A, 3 pri B, 5 pri C, 9 pri mơhnhôk ăm mâu ngế ki chêh, pro, mâu khu ki chêh pro ki châ kâ pri; rah xo 17 to hlá tơbeăng pơtroh veăng tơ’noăng tung rôh tơ’noăng má mơ’nui dêi Pri tơ’noăng Búa liềm vàng lâp tơnêi têa rôh má 5 hơnăm 2021.

A rôh leh, khu kăn pơkuâ hnê ngăn Đảng Dak Lak hiăng tơbleăng Pri hlá tơbeăng ‘na mơjiâng Đảng kong pơlê rôh má 4 hơnăm 2022, tơdrêng amê hnối pơkâ thế mâu kơ koan tơkŭm hbrâ rơnáu tơbleăng mâu tơdroăng tiô pơkâ tơpui, pro tơ’lêi hlâu vâ kăn ƀô̆, đảng viên, kuăn pơlê, ngế ki chêh hlá tơbeăng ki hmâ ƀă ôh tá hmâ kơhnâ veăng tung rôh tơ’noăng.

Katarina nga tơplôu ƀă tơbleăng