VOV4.XơĐăng - GDP 2021 châ 2,58% cho tơdroăng trâng ki kân; Tơdroăng pơkâ 128 cho tơdroăng ki tŏng kum ‘mâi mơnhông pêi cheăng kâ, tê mơdró, mơdêk kơchơ tê mơdró; Kơxô̆ liăn ‘no cheăng dêi kong têa ê tâk; Tíu hơ’lêh liăn ngân mơnhông rơdêi; Kơlo roê xúa kế tơmeăm tâk iâ má môi sap ing hơnăm 2016; Tê tơmeăm ngi kong têa ƀă roê kế tơmeăm mot tung tơnêi têa pơtối cho ivá ki mơdêk” ƀă hên tơdroăng ki ê.

Mâu tơdroăng kố nếo châ Khu xiâm riân ngăn kế tơmeăm khoăng, Khu xiâm pơkâ ƀă ‘no liăn cheăng tối nhên a rôh trâm kăn teăng mâ mâu kơ koan thŏng tâ̆n hlá tơbeăng, Tơbleăng kơxô̆ riân ngăn cheăng kâ rêh ối pơlê pơla hneăng má 4 ƀă tá hơnăm 2021. Pakĭng mê, tơdroăng cheăng kâ pơlê pơla 2021 ai mâu tơdroăng ki rơhêng vâ ‘nâi plĕng, môi tiah: vâ chê 160 rơpâu khu mơdró kâ mot tơrŭm ƀă vêh mot tơrŭm tung kơchơ mơdró – kơdroh tâng vâ pơchông ƀă hơnăm2020; pro mơhrê liăn ngân tâk 0,81%. Ai 2 kơvâ cheăng ai kơxô̆ liăn kơdroh hên cho ôm hyô ƀă kơxô̆ tơmối kong têa troh a Việt Nam kơdroh vâ chê 96%.

-Tối tơbleăng dêi khu xiâm pơkuâ riân ngăn ăm hlo, hơnăm  2021, tâi tâng kế tơmeăm ki rôe ing kong têa ê dêi lâp tơnêi têa châ lối 668,5 rơtal dollars, tung mê, kế tơmeăm tê ăm kong têa ê châ 336,25% rơtal dollars, tâk 19% tâng vâ pơchông ƀă hơnăm 2020. Ki tơxâng vâ tối, tung hơnăm 2021 ai 35 túa tơmeăm ki tê ăm kong têa ê lối 1 rơtal dollars, châ 93,8% tâi tâng kế tơmeăm tê ăm kong têa ê, tung mê ai 8 kế tơmeăm tê ăm kong têa ê lối 10 rơtal dollar, châ 69, 7%.

Tung hơnăm 2021 rak tơdâng ‘na tê mơdró pơtối tê hên châ (4 rơtal dollars), hdró hơnăm má 6 pơtối Việt Nam châ tê hên tơmeăm dêi tơdroăng tê mơdró lâp plâi tơnêi chiu tơdjâk ó, hâi chói hlo dêi pơreăng kân COVID-19. Ăm hlo ki tơ-brê dêi tê tơmeăm ăm kong têa ê hơnăm 2021 cho tơdroăng ki tơ-ƀrê tung mơnhông cheăng kâ dêi tơnêi têa.

Gương - Katarina Nga tơplôu ƀă tơbleăng