VOV4.Sêdang - Klêi kơ’nâi hên hâi ôh tá ai ngế nếo tro tâ pơreăng, kơxo lơ 26/9, a Gia Lai châ hlo 17 ngế nếo tro tâ COVID-19 tung pơlê pơla. Tung mê, ai 15 ngế a pơlê kong kơdrâm Plei Ku ƀă 2 ngế a tơring Đăk Đoa. Ki nhên, a pơlê kong kơdrâm Plei Ku, 15 ngế pơrá tơdjâk troh tôh 11, bêng Hoa Lư. Nôkố, CDC Gia Lai hiăng tăng hlo 22 ngế cho F1, 26 ngế cho F2 tơdjâk troh khu ngế tro tâ pơreăng kố. Tơtrŏng má môi, 2 ngế nếo tro tâ châ hlo a tơring Đăk Đoa pơrá ing Pơlê kong kân Hồ Chí Minh tung kơmăng lơ 21/9 ƀă rơxế ô tô krê, laga tối ăm ƀok thái pơkeăng ôh tá tơdrăng vâ ví klâ kơtăn tơkŭm.

Drêng tơbleăng ăm ƀok thái pơkeăng hngêi pơkeăng Adơk, tơring Đăk Đoa, khu râ kăn pơkuâ hiăng pơkâ klâ kơtăn a hngêi sap ing hâi lơ 25/9, laga tŭm 2 ngế ôh tá pêi tiô kơtăng tiô pơkâ, xuân ối prôk lăm hên tíu tung pơlê kong kơdrâm Plei Ku ƀă tơring Đăk Đoa.

A Sa Ly tơplôu ƀă tơbleăng