VOV4.Sêdang - Lối 34 ha kong rak peăng kơnhŏng têa a xá 1065 xua Vi ƀan hnê ngăn cheăm H’Bông, tơring Čư̆ Sê, kong pơlê Gia Lai pơkuâ hiăng tro ko ‘nhê, trâ văng nhâ loăng, pơchoh tơnêi, gu tơbăng tung plâ sap ing khế 3 hơnăm 2021 troh apoăng khế 9 hơnăm 2021. Tơdroăng kố hiăng ai 34 ngế ki ko kếo ‘nhê loăng, 23 ha kong tung mê hiăng pêt loăng ƀăch đang, mê khu râ pơkuâ ngăn dêi tơring nếo châ hlo, teăm mơdât. Tơdroăng ki ko kếo loăng kong kố cho tơdroăng pêi pro xôi kân, ti xê mơhno ăm to pin hlo khu ki tong mê hiăng khên tơnôu pêi pro tơdroăng xôi kân ó ‘nâng, mê ối mơhno tối tơdroăng ki tá hâi teăm tơniăn krá khâp pơla khu ngế ki pơcháu, rak ngăn kong a mâu tơring, cheăm.

Tơdroăng ai kơpong kong 1,2 ƀă 4, Tiêuh khu 1065, kong tât khía ối tung kơpong pơkuâ kong dêi Viƀan cheăm H’Bông, tơring Čư̆ Sê. Akố, mâu ngế gu tơnêikong hiăng mơdâng pro rơkôp ƀă ai tŭm mâu tơmeăm xúa rêm hâi ƀă djâ kơmăi kơmok vâ gu tơnêi kong, pêt lối 23,5 ha loăng băch đang, 11  ha ki ê hiăng châ mơgrúa lĕm loăng kong. Jâ Rmah H’Bé Nét – Kăn hnê ngăn Viƀan tơring Cư̆ Sê, kong pơlê Gia Lai tối ăm ‘nâi, mâu kơvâ dêi tơring mơnhên, roh gu tơnêi kong tât khía râ ó kố ai tung plâ tơdế hơnăm, sap ing khế 3 troh khế 9/2021, drêng khu cheăng kal kí tơring dế tơkŭm hbrâ mơdât pơreăng:

‘’Hơnăm 2021, tơring Čư Sê ai pơreăng COVID-19. Cheăm H’Bông ai 1 thôn thế kâng kơxái mơdât ôh tá ăm mot lo pa kong, xua mê khu cheăng kal kí tơkŭm hbrâ mơdât pơreăng, khu cheăng iâ, mơdât ôh tá tŭm. Xua mê, chiâng ai tơdroăng kố, ngin xuân hlo tá hâi châ tơƀrê tung mơdât tơdroăng kố’’.

Mâu ngế ki pro xôi mơdâng rơkôp ƀă djâ kơmăi kơmok mot tung kong vâ gu tơnêi kong, pêt loăng băch đang. Tâi tâng ƀăng kong tât khía tro gu ‘nhê cho 34,6 ha

Pakĭng xiâm kối ki tơdrêng kố, pôa Bùi Văn Cường – Kăn phŏ hnê ngăn Viƀan cheăm H’Bông, tơring Čư Sê tối ối ai mâu tơdroăng ki tá hâi tơtro tung tơdroăng pơcháu kong. Pôa Cường tối ăm ‘nâi, tơdế hơnăm 2019, drêng Khu pơkuâ kong tât khía Ayun Pa tro pơtê tâi tâng, cheăm châ pơcháu ăm lối 3.800 ha kong, tung mê ai lối 2.100 ha kong tât khía laga ôh tá ai rơxế ƀă khu cheăng pơkuâ vâ pêi pro hnoăng cheăng. Kơpong kong dêi cheăm cho kong tơkăng ƀă 2 tơring Phú Thiện ƀă ‘Mang Yang, xuân pro ăm tơdroăng gak ngăn kong trâm hên pá puât:

‘’Klêi kơ’nâi cheăm H’Bông tơdah kơpong kong kố mê ai hên tơdroăng ki pá puât môi tiah tơkâ troăng têa plông, lơ hluâ 2 tơring Phú Thiện, Ia Pa, tá prôk, tá vêh cho dâng 100km. Viƀan cheăm ôh tá ai khu ki pêi ƀă pôu râng hnoăng cheăng môi tiah khu gak ngăn kong’’.

Mâu ngế ki pro xôi hiăng teăm pêt 23,5 ha loăng băch đang tung tơnêi kong tât khía

Tơdjâk troh tơdroăng roh ko ‘nhê kong râ ó kố, pôa Thái Thượng Hải, Kăn pơkuâ Khu gak ngăn kong tơring Čư Sê, tối ăm ‘nâi, khu cheăng dế thăm séa ngăn, mơnhên mâu ngế ki pro xôi:

‘’Roh ai tơdroăng kân ó, xua mê Khu pơkuâ gak ngăn kong hiăng rơtế mâu kơvâ cheăng môi tiah kơ koan kan sát séa ngăn, Kơ koan séa ngăn tơdroăng. Apoăng xuân hiăng tơkŭm mâu ngế gu tơnêi kong, chêh xo rơkong tơpui vâ mơnhên tơdroăng pro kố. Ƀă ƀăng deăng tro gu tơnêi kong, gu ‘nhê kân, ki rơhêng vâ tối kố cho kong tât khía, mê Khu pơkuâ gak ngăn kong khŏm tơplâ mơdât, ti tăng mâu ngế pro xôi, pơxâu phak kơtăng tiô luât’’.

Rơtế ƀă tơdroăng hnê mơhno thăm séa ngăn, mơnhên roh tơdroăng, Viƀan tơring Čư Sê xuân hiăng tơbleăng roh tơdroăng troh Viƀan kong pơlê Gia Lai, Khu pơkuâ pêi chiâk deăng ƀă mơnhông mơdêk thôn pơlê kong pơlê, pơkâ thế pơcháu kong tât khía a cheăm ăm mâu khu ki pêi cheăng ƀă ai hnoăng, vâ tơdroăng gak ngăn, pơkuâ kong châ tơƀrê lĕm tâ.

Nguyễn Thảo chêh