VOV4.Sêdang - Drêng Têt Trung thu 2021, hâi lơ 20/9, Khu ki pêi dêi hnoăng cheăng dêi Vi ƀan hnê ngăn kong pơlê Gia Lai hiăng troh pôu, hbru tơmeăm ăm mâu vâi o kŭn a kơpong ki klâ ối krê tơkŭm ƀă vâi hdrêng ki dế pơlât COVID-19 a kong pơlê. Nôkố, lâp kong pơlê Gia Lai ai 92 ngế o kŭn dế châ klâ ăm ối krê tơkŭm ƀă 23 ngế dế pơlât COVID-19. Xua ôh tá châ hbru tơdrêng troh a kŏng ăm vâi o kŭn, ing mâu kăn ƀô̆ lêng a mâu kơpong ki klâ ối krê, mâu ngế ki mê tung khu hiăng pơtroh tơmeăm troh ăm vâi o ƀă rơkâu mâu vâi o loi nguăn, ivá rơdêi, rĕng klêi rôh klâ ối krê, prêi lĕm vâ vêh ƀă rơpŏng hngêi.

Mâu kế tơmeăm châ pơtroh ăm mâu vâi o a kơpong ki klâ ối krê

Pakĭng kế tơmeăm dêi Vi ƀan hnê ngăn kong pơlê Gia Lai, troh kơxê lơ 20/9, hiăng ai vâ chê 1 rơpâu hnoăng tơmeăm dêi mâu khu râ, kơvâ cheăng, khu pú hên hbru ăm mâu vâi o kŭn dế pêi pro tơdroăng ki klâ ối krê tơkŭm ƀă dế pơlât COVID-19. Mâu hnoăng tơmeăm kố hiăng rĕng châ mâu kăn ƀô̆, lêng diâp troh a kŏng ăm vâi o.

Katarina Nga tơplôu ƀă tơbleăng