VOV4.Sêdang - Tiô Pơkâ kơxô̆ 596 dêi Vi ƀan kong pơlê Gia Lai, sap hâi lơ 20/9 troh nôkố, vâ chê 14 rơpâu ngế kuăn pơlê trâm pá xua tơdjâk pơreăng COVID-19 châ tơdah phái tŏng kum dêi Chin phuh. Đăk Đoa cho môi tung mâu tơring apoăng dêi kong pơlê Gia Lai châ xing xoăng phái vâ tŏng kum kuăn pơlê dế trâm pá xua pơreăng COVID-19, sap ing 20/9. Troh nôkố, Kơ koan xiâm ‘Măn kơdĭng Tơnêi têa kơpong peăng kơnhŏng Tây Nguyên hiăng pơtroh phái troh 8 cheăm, pơlê kân dêi tơring ƀă tơdroăng xing xoăng phái dế châ tơkŭm pêi pro.

Vâ kơxô̆ phái tŏng kum troh teăm tơdrêng ƀă tro mơngế, tơdrêng amê tơniăn hbrâ mơdât pơreăng, mâu thôn, cheăm hiăng hbrâ mơngế, hbrâ hâi khế xing xoăng phái tơtro, tơdrêng amê tơbleăng nhên troh rêm rơpŏng kuăn pơlê. Tiô xing xoăng dêi Chin phuh, tung roh kố Gia Lai châ xing xoăng lối 200 tâ̆n phái, vâ tŏng kum ăm lối 3.300 rơpŏng ƀă vâ chê 14 rơpâu pơ’leăng mâ mơngế a 10 tơring. Rêm ngế châ tŏng kum 15 kg phái tung môi khế.

A Sa Ly tơplôu ƀă tơbleăng