VOV4.Sêdang - Vâ pêi pro kơtăng tơdroăng ki pêi pro tiô pơkâ 16/CT-TTg tiô tơdroăng ki pơkâ thế dêi Khu hnê mơhno cheăng hbrâ mơdât pơreăng COVID-19 Gia Lai, Vi ƀan hnê ngăn pơlê kong kơdrâm Plei Ku, kong pơlê Gia Lai ai hlá mơ-éa hnê mơhno tơdroăng ki prôk lăm, vâ kơdroh iâ má môi kơxô̆ ngế ki lăm lo a troăng. Vi ƀan hnê ngăn pơlê kong kơdrâm Plei Ku pơkâ thế mâu ngế ki lo a troăng xua ai tơdroăng ki kal vâ lăm lo a troăng djâ tơvế hlá mơéa chiâng phêp lo a troăng, lơ theh mơnhên pêi cheăng (hlá mơéa prôk troăng) vâ rak tơniăn tơdroăng ki prôk a troăng tơkâ luâ tíu gâk dêi mâu cheăm, bêng lơ mâu tôh séa ngăn ukố umê dêi khu Kŏng an pơlê kong kơdrâm.

Pơlê kong kơdrâm Plei Ku pêi pro tơdroăng pơkâ 16/CT-TTg sap ing hâi lơ 28/8 troh nôkố, hlo kuăn pơlê pêi pro kơtăng pơkâ. Laga, xuân ối ai mâu tíu ki ối tơkŭm hên mơngế, tơdroăng ki truâ kên pâng môh rơkong ôh tá tro pơkâ xuân ối ai, hên kuăn pơlê lo a troăng ôh tá ai tơdroăng kal. Sap ing hâi lơ 28/8 troh lơ 5/9, pơlê kong kơdrâm Plei Ku hiăng pơxâu phak 93 ngế pro xôi tơdroăng pơkâ hbrâ mơdât pơreăng, ƀă kơxô̆ liăn ai 303 rơtuh.

Katarina Nga tơplôu ƀă tơbleăng