VOV4.Sêdang - A tơbleăng kơxê lơ 8/9, Khu hnê mơhno hbrâ, mơdât pơreăng COVID-19 kong pơlê Gia Lai tơbleăng, sap ing 12 chôu kơmăng hâi lơ 9/9, ăm phêp pơlê kong kơdrâm Plei Ku pơtê klâ kơtăn pơlê pơla tiô Pơkâ 16/CT-TTg, tơdrêng amê pơkâ mâu tơring tung kong pơlê mơjiâng troăng pêi mơnhông cheăng kâ – rêh ối pơlê pơla drêng ‘’tơniăn tiah hmâ nếo’’. Khu hnê mơhno hbrâ, mơdât pơreăng COVID-19 Gia Lai pơkâ pơtối ăm pơtê pơtân mâu tơdroăng pêi cheăng ki ôh tá kal khât, kơchơ pơtân, kơchơ kŭn; kuăn pơlê ôh tá tơkŭm hluâ 10 ngế a kơ koan pêi cheăng, hngêi trung hriâm, hngêi pơkeăng, tíu tơdjuôm. Tíu tê hmê kơchâi kâ, têa ôu châ vêh tê mơdró, laga bu tê djâ vêh tê.

Pakĭng mê, kong pơlê Gia Lai xuân pơkâ pơlê kong kơdrâm Plei Ku pơtối kâng kơxái mơdât ôh tá ăm mot lo ƀă mâu tíu ki tơdjâk troh mơngế tro tâ pơreăng nếo châ hlo tung pơla achê kố; thâ ti tăng ngế tro tâ pơreăng, kâng kơxái mơdât ôh tá ăm mot lo kơpong kuăn pơlê rêh ối ai ngế tro tâ pơreăng. Ƀă mâu tơring, pơlê krâm ki ê, kong pơlê Gia Lai pơkâ mơjiâng troăng pêi gâk kring kơpong tơniăn, pêi pro mâu tơdroăng cheăng kâ – rêh ối pơlê pơla tiô troăng ‘’tơniăn tiah hmâ nếo’’.

A Sa Ly tơplôu ƀă tơbleăng