VOV4.Sêdang - Vâ rak vế tơniăn hnoăng cheăng pêi pro péa tơdroăng rế hbrâ mơdât pơreăng COVID-19, rế rak vế mâu tơdroăng cheăng kâ, tung pơla hdrối kố nah, kong pơlê Gia Lai hiăng ai hên troăng hơlâ rak tơniăn tơdroăng ki pơto chơ kế tơmeăm, malối cho tê, roê tơmeăm ngi kong têa a bo cheăng lâp plâi tơnêi Lệ Thanh, tơring Đức Cơ.

Gia Lai rak tơniăn “tíu ngiât” a bo cheăng lâp plâi tơnêi Lệ Thanh Thanh tung pơla ai pơreăng COVID-19

 Sap ing apoăng hơnăm troh nôkố, tơdroăng ki tê, roê kế tơmeăm ngi kong têa ing Bo cheăng Lệ Thanh, tơring Đức, kong pơlê Gia Lai đi đo châ rak tơniăn, châ tâi tâng kơxô̆ liăn pêi lo dâng 90 rơtuh dollars, tâk 78% tâng vâ pơchông ƀă khế kố hơnăm 2020. Tung mê, tơdroăng ki roê xo (ki hên cho kế tơmeăm pêi lo ing chiâk deăng châ 62% rơtuh dollars, tâk 2,5 hdroh.

Pôa Hoàng Lương Quang, kăn ngăn tơdroăng ki nâp hnoăng liăn mơhá tíu tơkăng kong Bo cheăng lâp plâi tơnêi Lệ Thanh, Khu xiâm nâp hnoăng liăn mơhá tíu tơkăng kong Gia Lai - Kon Tum ăm ‘nâi, khu ki cheăng a tíu nâp hnoăng liăn mơhá tíu tơkăng kong kong pơlê Gia Lai hiăng tơrŭm krá tơniăn ƀă khu ngăn pơkeăng, mố đô̆i gak tơkăng kong pêi pro kơtăng mâu tơdroăng pơkâ hbrâ mơdât pơreăng COVID-19 a kơpong ki pơto chơ kế tơmeăm.

Katarina Nga tơplôu ƀă tơbleăng