VOV4.Sêdang - Kơxê lơ 29/10, Khu kăn ki lăm séa ngăn dêi Khu ngăn cheăng pêi mố đô̆i tro rong ƀă rêh ối pơlê pơla xua pôa Vũ Trọng Bình, pro kăn pơkuâ djâ khu kăn kố, hiăng ai rôh pêi cheăng ƀă Khu ngăn cheăng pêi mố đô̆i tro rong ƀă rêh ối pơlê pơla kong pơlê Gia Lai ‘na pêi pro mâu troăng hơlâ tŏng kum rêh ối pơlê pơla, tŏng kum mâu ngế pêi cheăng ƀă ngế ki xúa mâu ngế ki pêi cheăng trâm pá xua pơreăng kân COVID-19.

Khu kăn xiâm ngăn 'na cheăng pêi ƀă pơlê pơla pôu pêi cheăng a kong pơlê Gia Lai

A rôh pêi cheăng ƀă khu kăn séa ngăn, mâu kăn xuân pơkâ mơ’no mâu troăng hơlâ ‘na ‘mâi mơnhông ƀă xúa mâu ngế pêi cheăng tung ƀă klêi kơ’nâi ai pơreăng kân COVID-19. Mâu troăng hơlâ pơkâ tơleăng xơpá ăm khu mơdró kâ, khu pêi cheăng tơrŭm, rơpŏng tê mơdró tơniăn pêi cheăng kâ vâ tơ’mot mâu ngế pêi cheăng, tŏng kum mâu ngế pêi cheăng vêh pêi cheăng nếo.

Tơpui a rôh pêi cheăng, pôa Vũ Trọng Bình mơnhên tối khât tơdroăng pêi pro mâu troăng hơlâ châ tơbleăng rĕng, rơkê, hên túa. Tung la ngiâ, kơvâ cheăng ki ai tơdjâk troh dêi kong pơlê Gia Lai kô pơtối mơdêk, djâ troăng hơlâ pơkâ troh ngế ki tro tơdjâk klêi kơ’nâi ai pơreăng kân COVID-19.

Katarina Nga tơplôu ƀă tơbleăng