VOV4.Sêdang - Kơxo lơ 27/10, ai 326 ngế kuăn pơlê dêi kong pơlê Gia Lai sap ing kơpong ki ai pơreăng a mâu kong pơlê peăng Hdroh hiăng châ khu ki pêi dêi hnoăng cheăng dêi kong pơlê tơdah vêh troh a pơlê kong kơdrâm Plei Ku tơniăn. Mâu kuăn pơlê ki châ tơdah vêh rôh kố cho hok tro mầm non, râ má môi ƀă nôu pâ vâi dế kreăng a Pơlê kong kân Hồ Chí Minh, 2 kong pơlê Bình Dương, Đồng Nai.

Gia Lai: Tơdah 326 ngế kuăn pơlê vêh sap ing kơpong ki ai pơreăng tơniăn

Klêi kơ’nâi vêh troh a pơlê kong kơdrâm Plei Ku, 125 ngế kuăn pơlê sap ing Pơlê kong kân Hồ Chí Minh vêh châ djâ troh a kơpong ki klâ ối krê tơkŭm a Tíu xiâm Hnê hriâm, ki rơkê plĕng ‘na cheăng lêng ƀă gâk kring (Trung đoân Bộ binh 991 Khu xiâm pơkuâ ngăn lêng kong pơlê Gia Lai. Mâu kuăn pơlê ki ối sap ing 2 kong pơlê Bình Dương ƀă Đồng Nai vêh klâ ối krê tơkŭm a Hngêi trung Kao đăng hnê cheăng pêi kơxô̆ 21 Ƀinh đoân 15. Tung pơla tơdah, djâ kuăn pơlê vêh a kong pơlê rak tơniăn, pêi pro kơtăng mâu tơdroăng pơkâ ‘na hbrâ mơdât pơreăng COVID-19.

Katarina Nga tơplôu ƀă tơbleăng