VOV4.Sêdang - Ƀơrô cheăng Chin phuh nếo ai hlá mơ-éa pơtroh ăm Vi ƀan hnê ngăn mâu kong pơlê, Pơlê kong kân Hà Nội, Pơlê kong kân Hồ Chí Minh, Bình Dương pơtroh rơkong ki pâ thế hnê mơhno dêi pôa Phạm Minh Chính, Ngế pro xiâm phŏ hnê ngăn tơnêi têa ‘na mâu tơdroăng tung hnoăng cheăng hbrâ, tơplâ mơdât pơreăng. Tiah mê, Ngế pro xiâm hnê ngăn tơnêi têa pơkâ thế Vi ƀan hnê ngăn mâu kong pơlê, pơlê kong kân rĕng pêi pro séa ngăn, ‘mâi rơnêu tơdrêng hlối mâu tơdroăng ki tá hâi pêi pro klêi a mâu cheăm, bêng, pơlê kân ‘na tŏng kum tơdroăng khăm pơlât, kế kâ ăm kuăn pơlê ƀă séa ngăn tơdroăng ki rak vế tơniăn hbrâ rơnáu kế tơmeăm hbrâ mơdât ăm khu ki pêi dêi hnoăng cheăng hbrâ mơdât pơreăng, mâu ngế ki pleăng dêi hnoăng cheăng, khu hbrâ mơdât pơreăng COVID-19 pơlê pơla ƀă hên ki ê.

Ngế pro xiâm hnê ngăn tơnêi têa pơcháu ăm Vi ƀan mâu kong pơlê, pơlê kong kân hriăn ngăn túa pơkâ séa ngăn tơkŭm ăm mâu ngế ki ối a kơpong ki ai hên kuăn pơlê rêh ối ki ôh tá rak tơniăn tơdroăng pơkâ thế klâ ối krê tiô pơkâ châ chêh inâi vêh ngi kong pơlê tiô tơdroăng ki rơhêng vâ, tung tơrŭm krá tơniăn, rơkê, tơdâng tơ’mô pơla mâu kong pơlê, rak tơniăn hbrâ mơdât pơreăng.

Katarina Nga tơplôu ƀă tơbleăng