VOV4.Sêdang - Klêi kơ’nâi châ tơƀrê dêi hneăng hôp ‘’Tơpui tơno tah lôi pá puât ƀă mâu khu tê mơdró ai kơxô̆ liăn mơ’no cheăng kong têa ê’’, kơxo lơ 6/11, pơlê kong kân Hà Nội pơtối tơkŭm po hneăng hôp ‘’Tơpui tơno tah lôi mâu tơdroăng pá puât ƀă mâu khu tê mơdró tung pơlê kong kân tung pơla pơreăng kân COVID-19’’. Hneăng hôp veăng amê ai 150 kăn teăng mâ – cho teăng mâ mâu Khu xiâm, kơvâ cheăng Tơnêi têa; khu râ kăn pơkuâ pơlê kong kân Hà Nội; Khu tê mơdró, kơvâ cheăng, khu tê mơdró dế pêi cheăng tung pơlê kong kân.

Hneăng hôp cho roh vâ khu râ kăn pơkuâ pơlê kong kân Hà Nội tơmâng mâu pâ thế dêi pơlê pơla khu tê mơdró, ing mê ai troăng tơleăng teăm tơdrêng tah lôi pá puât tung pơla tơdroăng pêi kâ, tê mơdró tro tơdjâk xua pơreăng COVID-19.

Nếo achê kố, Vi ƀan pơlê kong kân Hà Nội xuân hiăng tơbleăng pơkâ ‘na pro tơniăn ƀă mơnhông mơdêk cheăng kâ kâi trâng tơniăn, ƀeăn ƀĕng rơkê, mơdât châ tơƀrê pơreăng COVID-19 tung pái khế mơ’nui hơnăm 2022 – 2023.

A Sa Ly tơplôu ƀă tơbleăng