VOV4.Xơ Đăng - A Hà Nội, Vi ƀan xiâm Măt trâ̆n Tơnêi têa Việt Nam, kơpong tơ’noăng 5 pơlê kong kân ối tung Tơnêi têa tơkŭm po Hneăng hôp mơgêi tơdroăng kơpong tơ’noăng hơnăm 2021. Xông tơpui a Hneăng hôp, pôa Đỗ Văn Chiến, Kăn cheăng tung Tíu xiâm Đảng, Kăn xiâm hnê ngăn Vi ƀan xiâm Măt trâ̆n Tơnêi têa Việt Nam pơkâ thế Măt trâ̆n Tơnêi têa mâu râ hbrâ nhên vâ mâu ngế ki tro tơdjâk xua pơreăng COVID-19 tơdah Têt Nhâm Dần cho khât cho ‘’Têt dêi tuăn pâ’’.

Pôa Đỗ Văn Chiến pơkâ kơpong tơ’noăng 5 pơlê kong kân ối tung khu xiâm tơnêi têa kal thâ mơjiâng pơkâ tơkŭm po Têt Nhâm Dần hơnăm 2022 rak ngăn ăm mâu rơpŏng ai hnoăng tơnêi têa, mô đô̆i rong râ, mô đô̆i châi tamo, rơpŏng ai mô đô̆i hlâ tung tơplâ xâ, ki rơhêng vâ tối cho mâu ngế tro tơdjâk xua pơreăng COVID-19.

Pôa Đỗ Văn Chiến xuân pơkâ thế pơtối pơ’lêh nếo ‘na tơdroăng xiâm, troăng pêi ƀă tơdroăng séa ngăn, mơnhên pơlê pơla; tơmâng troh troăng séa ngăn, tơmâng xo rơkong tơpui dêi kuăn pơlê ƀă mâu tơdroăng ki tô tuăn, tơdjâk troh hnoăng, ki pơxúa tro luât, tơxâng dêi kuăn pơlê.

A Sa Ly tơplôu ƀă tơbleăng