VOV4.Sêdang - Ƀơrô cheăng Khu hnê mơhno cheăng Tơnêi têa ‘na hbrâ ví khía mơhot têa kân lân lu nếo ai hlá mơ-éa pơtroh ăm Khu hbrâ ví khía mơhot têa kân lân lu ƀă tí tăng tŏng xo mâu ngế hliăng tiâ mâu kong pơlê, pơlê kong kân a kĭng têa kơxĭ sap ing Quảng Ninh troh Bình Thuận ƀă kơpong Peăng Kơnhŏng; mâu Khu xiâm ngăn chiâk deăng ƀă Mơnhông thôn pơlê, Khu xiâm ngăn pơkeăng ƀă khăm pơlât, Khu xiâm pơkuâ ngăn lêng, Khu xiâm ngăn Kŏng an, Khu xiâm ngăn troăng prôk ƀă rơxế kơtâu ƀă Khu xiâm ngăn cheăng kơmăi kơmok ƀă tê mơdró tơbleăng mâu túa pơkâ hbrâ rơnáu hbrâ ví ƀă kong mêi khía mơhot têa kân lân lu ai inâi kong têa ê cho Conson ƀă kong mêi kân.

Ki xiâm dêi hlá mơ-éa kố pơkâ thế Khu hnê mơhno hbrâ ví khía mơhot têa kân lân lu ƀă tí tăng tŏng xo mâu ngế hliăng tiâ, mê mâu Khu xiâm, kong pơlê nếo tối a kơpêng séa ngăn túa pơkâ hbrâ ví ƀă tơbleăng hnoăng cheăng hbrâ ví khía mơhot têa kân lân lu tung pơla ai pơreăng COVID-19 tiô hnê mơhno dêi Ngế pro xiâm hnê ngăn Chin phuh, malối cho túa pơkâ ki ‘mâi xĕn kuăn pơlê rak tơniăn ăm tâi tâng mâu tơdroăng ki trâm khía mơhot têi, kong mê, têa kân lân lu, pro tơhnah tơhnâp tơnêi ƀă rak tơniăn hbrâ mơdât pơreăng ƀă rak mâu tíu ki ‘mâi xĕn kuăn pơlê.

Katarina Nga tơplôu ƀă tơbleăng