VOV4.Sêdang - Klêi kơ’nâi Pơlê kong kân Hồ Chí Minh pơkâ tơdroăng 18, tung mê ămphêp kuăn pơlê chiâng prôk lăm ƀă mâu tơdroăng ki pơkâ, ai mâu kong pơlê Đông Nam Bộ xuân hiăng pơkâ túa ăm mâu ngế pêi cheăng prôk lăm pơla mâu kong pơlê dêi rơpó. Vi ƀan hnê ngăn kong pơlê Long An môi tuăn tiô pơkâ tơkŭm ăm mâu ngế pêi cheăng prôk lăm pơla Pơlê kong kân Hồ Chí Minh ƀă mâu kong pơlê Bình Dương, Đồng Nai, Tây Ninh. Laga, kong pơlê Long An pâ thế Vi ƀan hnê ngăn Pơlê kong kân Hồ Chí Minh pơtê lôi séa ngăn hlá mơ-éa mơnhên tiô túa, bu kal séa ngăn ƀă hlá mơ-éa tung tơdroăng ki pơkâ thế dêi khu mơdró kâ xua Khu ngăn troăng prôk ƀă rơxế kơtâu tung kơpong hbru ăm.

Mâu kong pơlê Đông Nam Bộ pơkâ túa ăm mâu ngế pêi cheăng châ prôk lăm pơla mâu kong pơlê

Vi ƀan hnê ngăn kong pơlê Tây Ninh môi tuăn ƀă túa pơkâ dêi kơxop hlá mơ-éa ƀă tơdroăng ki veăng hnê tối ‘na pâk vaccine cho hiăng pâk iâ hlái môi hdroh klêi kơ’nâi 21 hâi, lơ hiăng pơlât prêi pơreăng COVID-19 tung pơla 6 khế ƀă klêi kơ’nâi séa ngăn âm tĭnh tung pơla 72 chôu. Kong pơlê Bình Dương ăm phêp kuăn pơlê, khu ki rơkê châ tơdah ƀă rơxế sap ing mâu kong pơlê, pơlê kong kân.

Katarina Nga tơplôu ƀă tơbleăng