VOV4.Xơ Đăng - Ngế pro xiâm hnê ngăn Chin phuh nếo ai hlá mơ-éa pơkâ thế mâu Khu xiâm, kơvâ cheăng, kong pơlê rak tơniăn troăng prôk tung rôh Têt Lo hơnăm nếo, Têt Nguyên đán Nhâm Dần ƀă Mơdĭng hơngui 2022. Hlá mơ-éa mê pơkâ thế Vi ƀan tơniăn troăng prôk Tơnêi têa, mâu Khu xiâm, kơvâ cheăng, mâu khu tơrŭm tơdroăng cheăng kal kí rêh ối pơlê pơla ƀă Vi ƀan hnê ngăn kong pơlê, pơlê kong kân ối tung tơnêi têa séa ngăn hnoăng cheăng, pơkâ thế ƀă tơkŭm pêi pro mâu hnoăng cheăng, troăng hơlâ hnê tối, tơbleăng tơdroăng pơkâ ‘na luât, hnê mơhno nhên ‘na rak tơniăn troăng prôk ƀă hbrâ mơdât pơreăng COVID-19 drêng veăng prôk lăm a troăng dêi kuăn pơlê.

Tơkŭm rôh lăm pơtrui ngăn, séa ngăn, pơxâu phâk mâu ngế ki pro xôi pơkâ ‘na luât troăng prôk sap ing hâi lơ 15/12/2021 troh tâi lơ 14/2/2022; mơjiâng mâu túa pơkâ ‘na kơto rơxế a troăng; ƀă ai túa pơkâ xing xoăng mâu khu lêng, rơxế, kế tơmeăm xúa tung khăm pơlât, pơkeăng pơlât ƀă mơheăm vâ rak tơniăn tro má môi tung tơdroăng pơlât mâu ngế ki trâm xía vâ a troăng prôk, kơdroh tơdroăng ki hlâ rong ‘na mơngế drêng tơklâm rơxế a troăng prôk.

Katarina Nga tơplôu ƀă tơbleăng