VOV4.Xơ Đăng - Hngêi trung Phôh thong hdroâng kuăn ngo ai tíu kâ koi ối pơtê la nôu pâ vâi chĕm mơ’rêh dêi Hngêi trung râ má péa Kroong a kơpong hngế hngo cheăm Kroong, tơring Kƀang, kong pơlê Gia Lai. Pakĭng tơdroăng ki hnê, mâu thái cô ối xúa tơdroăng ki pâ nhuô̆m vâ mơhnhôk hok tro cho kuăn pơlê hdroâng kuăn ngo troh hngêi trung.

A kơxo má hâi môi apoăng măng tĭng, mâu thái cô a Hngêi trung Hdroâng kuăn ngo kâ koi ối pơtê la nôu pâ vâi chê̆m mơ’rêh dêi Hngêi trung râ má péa Kroong hiăng riu koi xâp ếo hơtô, xâp tơ’nôm ếo mêi vâ troh a pơlê Tung Gút, kơtăn ing hngêi trung dâng 10 km, “tăng” hok tro. Troh a go pơlê, ngoh Đinh Uýt, kăn pơkuâ pơlê Tung Gút hiăng kôm hlâu amê, rơtế ƀă mâu thái cô xoăng tơrêm khu, troh rêm hngêi vâ mơhnhôk mâu vâi o vêh hriâm.

Vâ chê 7 chôu kơxo má, hiăng ai 6 ngế hok tro a kŏng râng kơtong hmân ếo ‘nâi pa rŏng rơxế hon đa mâu thái cô vâ vêh a hngêi trung vâ hriâm. Kăn pơkuâ thôn Đinh Uýt, ăm ‘nâi:

“Rôh kố cho hiăng péa xôh á hiăng tơrŭm ƀă thái cô vâ krếo thế hok tro vêh hngêi trung, drêng ‘na tơrŭm ƀă khu râ kơvâ cheăng, đoân theh, đảng viên a pơlê veăng krếo thế vâ mâu vâi o troh hngêi trung troh lâm. Ai drêng ‘na hôp hnê tối a pơlê, ai drêng ‘nâ tơrŭm ƀă nôu pâ hnê khĕn vâi muăn, kuăn ‘nĕng troh hngêi trung troh lâm, veăng ƀă thái cô mơhnhôk a kong măng xuân ai”.

Mâu thái cô lăm mơhnhôk hok tro sap ing kơxo má

Cho môi tung mâu thái cô hơnăm ối nếo má môi dêi hngêi trung, thái Nguyễn Quốc Triều tối, hên xôh ngoh ƀă mâu thái cô ki ê tro tơ’nhiê rơxế a troăng, kơtong a troăng, hmân ếo krêa to tơnêi trâp.

“Tung pơla pêi cheăng hnê 4 hơnăm mê tung hơnăm ki apoăng gá tơbrêi tơbrêh khât, troăng prôk lăm xơpá. Á tơmiât troh hok tro dêi tơná kal mâu chư mê athế mơ-eăm vâ kum mâu vâi o a kơpong hngế hngo vâ mâu vâi o châ hriâm chư, châ hriâm mâu tơdroăng ki nếo vâ pro tơdroăng hbrâ rơnáu ăm dêi tơná tung hiăng kân ah”.

Kơtăn ing dế tơring Kƀang lối 40 km, Hngêi trung Phôh thong hdroâng kuăn ngo ai tíu kâ koi ối pơtê la nôu pâ vâi chĕm mơ’rêh dêi Hngêi trung râ má péa Kroong ối tung thông kơpong ngo. Hngêi trung kố hiăng châ pro lối 17 hơnăm, nôkố ai 14 ngế thái cô, ƀă 322 ngế hok tro, ki hên cho hdroâng kuăn ngo Bơhnéa. Thái Phan Danh, kăn phŏ pơkuâ hngêi trung ăm ‘nâi, tung pơla hdrối, drêng pơreăng COVID-19 tâ tú, hok tro ôh tá ai tŭm tơdroăng ki vâ hriâm ing troăng hyôh Internet, mâu thái cô athế chêh phĭu hriâm tâp djâ troh a rêm pơlê ăm mâu vâi o.

Troăng prôk troh hngêi trung dêi mâu thái cô kơ’vĕng kơ’vŏng, tơbrêi tơbrêh

Sap ing tơdế khế 11 kố, hok tro pơtối vêh hriâm a hngêi trung. Laga, kơxô̆ hok tro pơtê hên, thái cô athế lăm mơhnhôk mâu vâi o troh a hngêi trung. Rêm rôh mơhnhôk cho môi tơdroăng ki tơbrêi tơbrêh. Thái Phan Danh tối:

“Tơdroăng ki rơhêng vâ hriâm dêi mâu vâi o tá hâi kơhnâ, tá mâu nôu, pâ vâi o vâi xuân ôh tá rơhêng vâ ăm dêi kuăn lăm hriâm xua nôkố hok tro râ má 2 mâu vâi o hiăng kân, hiăng ‘nâi pêi cheăng ƀă rơpŏng ngăn mâu vâi o cho ngế ki pêi cheăng xiâm tung rơpŏng hngêi. Ai mâu ngế ki ‘nâ ôh tá loi mê nôu pâ ôh tá ăm kuăn lăm. Ai mâu hok tro ki ‘nâ ngin lăm mơhnhôk, nôu pâ vâi hêng hôu, thế thái cô châ mê hnoăng cheăng mơhnhôk gá xơpá khât.

Tâng hlo hok tro vêh hngêi trung tá hâi tơniăn mê hngêi trung athế krếo thế thái cô tơdrêng hlối sap ing kơxê hâi tĭng vâ kong măng hâi tĭng ƀă kơxo hâi môi thái cô athế lăm mơhnhôk vâi vêh hriâm”.

Tơkâ luâ mâu tơdroăng xơpá, mâu thái cô a Hngêi trung Phôh thong hdroâng kuăn ngo kâ koi ối pơtê Hngêi trung râ má péa Kroong xuân tâi hiâm mơno pâ nhuô̆m hok tro, hâk vâ ƀă tơdroăng cheăng hnê. Tơdroăng ki phiu ro kân má môi dêi thái cô a tíu kố cho mâu vâi o hok tro ôh tá lo pơtê hriâm, vâ xo ah hmôi pôi tá ai xếo tơdroăng ki kơtiê xơpá.

Hoàng Qui chêh

Katarina Nga tơplôu ƀă tơbleăng