VOV4.Xơ Đăng -  Kơxo lơ 9/12 a Hà Nội, Bôrô ngăn tê mơdró ƀă cheăng ‘na kơmăi kơmok Việt Nam tơrŭm ƀă Hô̆i đong Khu mơdró xua tơdroăng mơnhông mơdêk krá tơniăn Việt Nam tơkŭm po leh tơbleăng Khu mơdró krá rơdêi a Việt Nam. Pôa Vũ Đức Đam, Ngế pro xiâm phŏ hnê ngăn tơnêi têa, Kăn xiâm hnê ngăn Hô̆i đong tơnêi têa ‘na mơnhông mơdêk krá tơniăn ƀă mơdêk ivá tơbriât cheăng tê mơdró, kăn hnê mơhno mâu Khu xiâm kơvâ cheăng dêi  tơnêi têa,

Kăn hnê mơhno mâu khu tơrŭm cheăng lâp plâi tơnêi a Việt Nam troh veăng hôp. ƀă pơxá “ troăng prôk troh hơnăm mơnhông mơdêk krá tơniăn lĕm tâ” ôh tá lôi ngế ối pá rŏng”, mâu kăn tơkŭm tơpui ‘na luât pơkâ ƀă mơnhông mơdêk, troăng rơhlâ dêi tơnêi têa ‘na mơnhông mơdêk ngiât lĕm pơla hơnăm 2021-2030, pêi pro tơdroăng pơkâ tơpéa tơdroăng mơnhông mơdêk rĕng ƀă krá ton tung chât hơnăm la ngiâ.

Tơpui a hneăng hôp, pôa Vũ Đức Đam púi vâ, mâu khu mơdó pơtối rơtế ƀă dêi rơpó pêi mâu tơdroăng hơ’lêh mơhé kŭn kĭn xua tơdroăng mơnhông mơdêk krá tơniăn. Pôa Vũ Đức Đam tối nhên: Tung pơla ai pơreăng kân COVID-19, a Việt Nam xuân môi tiah mâu kong têa ăm hlo tơrêm ngế kuăn pơlê, tơrêm khu mơdró ai kơdĭng liăn, ai ‘măn, ai hriâm tơdroăng rơkê, kô chiâng ivá ki rơdêi kum hmâ ƀă tơdroăng tung la ngiâ.

Gương tơplôu ƀă tơbleăng