VOV4.Xơ Đăng - Kơxo lơ 25/11, a tíu pêi cheăng Chin phuh, pôa Lê Văn Thành, Ngế pro xiâm phŏ hnê ngăn tơnêi têa pơkuâ hneăng hôp mơnhên pơkâ kơpong tơbăng kroăng Cửu Long hneăng hơnăm 2021 – 2030, tơmiât pêi troh hơnăm 2050. Pơkâ pêi kơpong Tơbăng kroăng Cửu Long hneăng hơnăm 2021 – 2030, tơmiât pêi troh hơnăm 2050 cho hlá mơ-éa kơchuâ pơkâ pêi ai pơxúa ton xŏn ƀă tơdroăng mơnhông mơdêk dêi kơpong tối tơdjuôm ƀă 13 kong pơlê tung kơpong tối krê.

Tơdroăng mơjiâng pơkâ pêi kơpong tơbăng kroăng Cửu Long vâ mơnhên troăng mơnhông mơdêk, xing xoăng tíu ƀă kơxô̆ liăn ăm mâu tơdroăng cheăng kâ – rêh ối pơlê pơla, cheăng lêng, kring tơniăn, rak vế kong prâi hên kơvâ ki tơdjâk dêi pó, hên kơpong ƀă hên kong pơlê tiô tơdroăng mơnhông tơmeăm ki ai, ki ó rơdêi dêi kơpong, mơhnhôk ƀă xúa châ tơƀrê mâu tơmeăm vâ mơnhông mơdêk kơpong tơbăng kroăng Cửu Long troh hơnăm 2050 chiâng kơpong tíu mơnhông mơdêk hôm păng ‘nâng tâng pơchông ƀă lâp tơnêi têa tiô pơkâ mơ’no a Pơkâ kơxô̆ 120 dêi Chin phuh.

A Sa Ly tơplôu ƀă tơbleăng