VOV4.Sêdang - Kơxo lơ 8/10, a Hà Nội tơkŭm po Hneăng hôp mơ’no tơdrêng tung um tiô troăng măng Internet lâp plâi tơnêi mơgêi tơdroăng pêi cheăng hdroâng mơngế 9 khế apoăng hơnăm ƀă pêi pro hnoăng cheăng xiâm 3 khế mơ’nui hơnăm 2021. Hneăng hôp hiăng châ tơmâng rơkong veăng tơpui tối dêi kăn teăng mâ mâu kong pơlê ai kơdrâm vâi krâ hdroâng kuăn ngo rêh ối. Mâu rơkong tơpui tơkŭm tối mâu tơdroăng châ tơƀrê hiăng châ tung tơdroăng rak ngăn tơdroăng rêh ối dêi vâi krâ hdroâng kuăn ngo, xuân môi tiah hbrâ, mơdât pơreăng COVID-19 a kơpong hdroâng kuăn ngo, kong ngo.

Pakĭng mê, mâu rơkong tơpui tối xuân mơhno mâu tơdroăng pá puât, tơvâ tơvân tung pêi pro troăng hơlâ tung rơxông nếo, tơdrêng amê pơkâ troăng tah lôi pá puât. Xông tơpui a hneăng hôp,  pôa Hầu A Lềnh, Ngế xiâm, Kăn pơkuâ Vi ƀan hdroâng kuăn ngo tối ăm ‘nâi, tung pơla pơreăng kân COVID-19 tơ’lêi xông tâ tú, kơ koan pêi tơdroăng hdroâng kuăn ngo sap ing tơnêi têa troh kong pơlê thế mơ-eăm mơnhông hnoăng, tơrŭm ƀă mâu kơ koan tung khu cheăng kal kí, vâ ai troăng hơlâ ăm vâi krâ hdroâng kuăn ngo ƀă kong ngo châ tơƀrê lĕm má môi.

A Sa Ly tơplôu ƀă tơbleăng