VOV4. Xơ Đăng -  Kơxo lơ 16/12, a Hà Nội, Khu xiâm pơkuâ ‘na pêi chiâk deăng ƀă mơnhông mơdêk thôn pơlê tơrŭm ƀă Tơdroăng mơnhông mơdêk Khu lâp kong têa a Việt Nam ƀă Khu pơkuâ râng liăn Mơnhông mơdêk pêi chiâk deăng lâp plâi tơnêi tơkŭm po Hneăng hôp tâi tâng Tơdroăng Tŏng kum lâp plâi tơnêi hơnăm 2021. Hneăng hôp cho hneăng tơpui tơno troăng hơlâ khu râ kăn xiâm châ tơkŭm po rêm hơnăm pơla Khu xiâm pơkuâ ‘na pêi chiâk deăng ƀă mơnhông mơdêk thôn pơlê ƀă mâu kong têa ki tŏng kum lâp plâi tơnêi, grup pơkuâ khu tê mơdró, khu tơrŭm cheăng rơtế tơpui tơno, tối mâu pơkâ pêi la ngiâ troăng hơlâ, kơjo dêi péa pâ vâ thăm tơrŭm cheăng lâp plâi tơnêi, thăm xing xoăng mâu khu cheăng thăm pêi pro tơdroăng mơnhông pêi chiâk deăng Việt Nam tiô troăng krá tơniăn ƀă tâi tâng.

Ƀă dó inâi ‘’Khu tơrŭm pêi cheăng krúa lĕm ăm môi tơdroăng pêi chiâk deăng nếo’’, hneăng hôp kô kơ-êng Tơdroăng tơkêa bro Troăng pêi ton xŏn mơnhông mơdêk pêi chiâk deăng, thôn pơlê krá tơniăn hneăng hơnăm 2021 – 2030, tơmiât pêi troh hơnăm 2050 ƀă Pơkâ pêi tơnêi têa dêi Việt Nam ‘na tơmeăm kâ krá tơniăn hneăng hơnăm 2021 – 2030.

A Sa Ly tơplôu ƀă tơbleăng