VOV4.Xơ Đăng - Kơxo lơ 22/11, pôa Phạm Minh Chính, Ngế pro xiâm hnê ngăn tơnêi têa hiăng pơkuâ xiâm khu râ kăn Việt Nam, rơtế khu râ kăn pơkuâ ASEAN ƀă pôa Tập Cận Bình, Kăn xiâm hnê ngăn kong têa Sinuâ veăng Hneăng hôp mơ’no tơdrêng tung um tiô troăng măng Internet Khu râ kăn xiâm leh tơbâ 30 hơnăm tơrŭm cheăng ASEAN – Sinuâ. Xông tơpui a Hneăng hôp, tơmiât troh la ngiâ, pôa Phạm Minh Chính tối rơdêi ASEAN ƀă kong têa Sinuâ kal pơtối thăm pro loi tơngah troăng pêi ton xŏn ƀă thăm tơrŭm cheăng tŭm têk, mơdêk mâu tơdroăng châ tơƀrê, tơmiât troh pơkâ kân tâ, mâu tơdroăng ki pơxúa rơdâ tâ ăm tơrŭm cheăng ASEAN – Sinuâ.

Hneăng hôp tơpui tơno mơ’no tơdrêng tung um tiô troăng măng Internet leh tơbâ 30 hơnăm tơrŭm cheăng tơpui kâ ASEAN – Sinuâ

Ngế pro xiâm hnê ngăn tơnêi têa mơnhên, ing xiâm kối tơrŭm pơla péa kong têa ki achê, tơrŭm tiô khôi vâi krâ nah lĕm tro ƀă kong têa Sinuâ, Việt Nam pơtối mơ-eăm kum ăm tơrŭm cheăng ASEAN – Sinuâ mơnhông mơdêk tro tơdroăng dêi khu tơrŭm tŭm têk, veăng kum kal khât vâ mơnhông, thăm mơjiâng hơniâp lĕm, gak kring, tơniăn, tơrŭm cheăng, mơnhông mơdêk krá tơniăn a kơpong ƀă tung lâp plâi tơnêi, djâ ki pơxúa păng ‘nâng ăm rêm kong têa ƀă ăm phâi hơtô ƀă hơniâp lĕm dêi rêm ngế kuăn pơlê, ôh tá lôi kơbố parŏng.

A Sa Ly tơplôu ƀă tơbleăng