VOV4.Xơ Đăng - Vi ƀan Mơhno mơjiâng túa lĕm tro ƀă hnê hriâm dêi Kuô̆k hô̆i nếo tơrŭm ƀă Khu xiâm mơhno mơjiâng túa lĕm tro ƀă ôm hyô ƀă kong pơlê Nghệ An tơkŭm po Hneăng hôp tơpui tơno ‘’Ôm hyô Việt Nam – pro tơniăn ƀă mơnhông mơdêk’’. Xông tơpui hnê mơhno hneăng hôp, pôa Trần Thanh Mẫn, Kăn xiâm phŏ hnê mơhno má Kuô̆k hô̆i  mơnhên, mơnhông mơdêk kơvâ Ôm hyô cho môi troăng hơlâ kân dêi Đảng, Tơnêi têa pin.

Pơreăng kân COVID-19 xông tâ tú ton 2 hơnăm hiăng tơdjâk kân troh tơdroăng mơnhông mơdêk cheăng kâ – rêh ối pơlê pơla dêi Tơnêi têa, tung mê ai kơvâ ôm hyô. Xua tơdjâk dêi pơreăng, troh nôkố, tơnêi têa pin tá hâi tơdah tơmối ôm hyô lâp plâi tơnêi, tơmối ôm hyô tung tơnêi têa pơtối kơdroh lối 42% tâng pơchông ƀă roh kố hơnăm hdrối; tâi tâng pêi lo liăn ing tơmối ôm hyô tiô xêo kơdroh 50%.

Hneăng hôp tơpui tơno ‘’Ôm hyô Việt Nam – pro tơniăn ƀă mơnhông cheăng kâ’’

Hneăng hôp tơpui tơno pơtối pro nhên tâ tơrŭm cheăng dêi Tơdroăng pro tơniăn mơnhông cheăng kâ – rêh ối pơlê pơla dêi tơnêi têa ƀă mâu tơdroăng, pơkâ pêi, troăng prôk pro tơniăn, mơnhông mơdêk ôm hyô; pơkâ thế mâu troăng pêi la ngiâ, troăng hơlâ, ki má lối cho mâu troăng hơlâ ‘na pro tơniăn hbrâ mơdât pơreăng vâ lôu péa tơniăn; mâu troăng hơlâ mơdêk ivá tơbriât cheăng dêi ôm hyô Việt Nam tung pơla rơxông nếo.

A Sa Ly tơplôu ƀă tơbleăng