VOV4.Xơ Đăng - Klêi kơ’nâi 3 hâi pêi cheăng kơtăng, hâi lơ 10/12, Hô̆i đong hnê ngăn kong pơlê Dak Lak hneăng 10, hơnăm 2021 – 2026 hiăng pêi klêi rôh pêi cheăng dêi Hneăng hôp má pái ƀă hên tơdroăng ki kal ƀă pêi pro troh tơdroăng mơgêi Hneăng hôp. Tung tơdroăng ki tơpui tơno, séa ngăn tâi tâng tơdroăng, mâu hlá mơ-éa ki pơchuât tơbleăng, pơtroh, Hneăng hôp hiăng môi tuăn khât tơbleăng 30 tơdroăng pơkâ.

Hô̆i đong hnê ngăn kong pơlê Dak Lak: Mơ-eăm pêi pro ƀlêi chiâng hnoăng cheăng mơnhông cheăng kâ dêi kong pơlê hơnăm 2022 

Tung mê, hên tơdroăng pơkâ ki kal, kum ăm tơdroăng ki mơnhông mơdêk cheăng kâ rêh ối; mơhno túa lĕm tro rêh ối pơlê pơla; rak tơniăn gak kring pơlê pơla cheăm bêng dêi kong pơlê, môi tiah: Tơdroăng pơkâ ‘na mơnhông mơdêk cheăng kâ, rak tơniăn pơlê pơla cheăm bêng hơnăm 2022; Túa pơkâ mơjiâng ƀă mơnhông pơlê kong kơdrâm Ƀuôn Ma Thuột troh hơnăm 2030, troăng ngăn troh hơnăm 2045; tŏng kum mơnhông cheăng kâ khu pú hên kong pơlê Dak Lak hneăng hơnăm 2021 -2025.

Tơpui mơgêi hneăng hôp, pôa Y Vinh Tơr, Ngế ki hbrâ vâ cheăng tung Tíu xiâm Đảng, kăn hnê ngăn Hô̆i đong kong pơlê, kăn pơkuâ khu kăn Kuô̆k hô̆i kong pơlê Dak Lak tối nhên, mâu tơdroăng pơkâ châ tơbleăng a Hneăng hôp ai pơxúa kal khât ƀă tơdroăng pêi pro ƀlêi chiâng hnoăng cheăng mơnhông mơdêk cheăng kâ rêh ối dêi kong pơlê hơnăm 2022 ƀă mâu hơnăm ki pơtối.

Katarina Nga tơplôu ƀă tơbleăng