VOV4.Xơ Đăng - Pơtối hneăng hôp má 3, Hô̆i đong hnê ngăn kong pơlê Dak Lak hneăng 10, hâi lơ 9/12 mâu kăn hiăng séa ngăn tơpui tơno ‘na mâu hlá mơ-éa ki pơtroh ai tơdjâk troh tơdroăng ki mơnhông mơdêk cheăng kâ rêh ối dêi kong pơlê hơnăm 2022 ƀă hneăng hơnăm 2020 -2022. Mâu tơdroăng ki ai tơdjâk troh tơ’mot ‘no liăn cheăng, tăng cheăng pêi ăm mâu ngế pêi cheăng ki tro tơdjâk xua pơreăng COVID-19 hiăng châ hên mâu kăn tơmâng ngăn.

Hơnăm 2021, ki rơdêi ‘na mơdêk cheăng kâ dêi kong pơlê Dak Lak châ 5,1%, tiô tối hdrối hơnăm 2022 mơ-eăm châ 7,27%, tiô mâu kăn, vâ pêi pro tơdroăng pơkâ kố tung pơla ai pơreăng tâ tú ôh tá tơniăn ƀă ôh tá ‘nâi hdrối mê Vi ƀan hnê ngăn kong pơlê athế tơkŭm pơkâ tơleăng mâu tơdroăng ki tá hâi teăm tơleăng klêi tung tơdroăng tơ’mot ‘no liăn cheăng.

Mâu kăn séa ngăn mâu hlá mơ-éa pơtroh ai tơdjâk troh vâ mơnhông cheăng kâ rêh ối kong pơlê Dak Lak hơnăm 2022

Malối cho tơdroăng ki xơpá ‘na xúa tơnêi ƀă tơdroăng ki chêl thiăn tơnêi tíu. Rơtế ƀă tơmâng ngăn tơ’mot ‘no liăn cheăng, tơdroăng tăng cheăng pêi ăm mâu ngế pêi cheăng xuân châ mâu kăn pơkâ mơ’no. Tiô tối tơbleăng dêi Khu ngăn cheăng pêi mố đô̆i tro rong ƀă rêh ối pơlê pơla Dak Lak, tung rôh pơreăng COVID-19 tâ tú rôh má 4, ai vâ chê 140 rơpâu ngế sap ing mâu kong pơlê peăng Hdroh vêh. Tung mê ai vâ chê 24% ngế rơhêng vâ vêh ngi kong pơlê pêi cheăng ƀă rơhêng vâ châ mung liăn sap ing 20 troh 80 rơtuh liăn vâ mơnhông cheăng kâ.

Xua mê, kăn pơkâ thế kong pơlê kal ai troăng hơlâ tŏng kum ‘na mung liăn tăng tơdroăng cheăng kâ ăm mâu ngế pêi cheăng ki ối pêi cheăng a kong pơlê.

Nga tơplôu ƀă tơbleăng