VOV4.Xơ Đăng - Kơxo lơ 10/12, pơtối tơdroăng hneăng hôp má 4, Hô̆i đong kong pơlê Gia Lai hneăng má XII, mâu kăn hiăng tơbleăng tơdroăng tơpui tơno a tôh ƀă hên tơdroăng ki kal. A hneăng hôp, mâu kăn hiăng môi tuăn ƀă tơdroăng xiâm tơbleăng tơdroăng pêi pro hnoăng cheăng kâ – rêh ối pơlê pơla, tơdroăng hnê mơhno pơkuâ dêi Vi ƀan kong pơlê tung hơnăm 2021. Mâu kăn teăng mâ tối, mơhé trâm hên tơdroăng pá puât, pơloăng mơnúa xua COVID-19, mơhé mê, um méa cheăng kâ – rêh ối pơlê pơla lâp kong pơlê Gia Lai hơnăm kố ai hên tíu eăng.

Pôa Lưu Trung Nghĩa, Kăn teăng mâ, Kăn pơkuâ Khu pơkuâ ‘na pêi chiâk deăng ƀă mơnhông mơdêk thôn pơlê kong pơlê Gia Lai xông tơpui ‘na tơdroăng tŏng kum tê tơmeăm pêi lo ing chiâk deăng

Pakĭng mê, mâu tơdroăng ki tô tuăn ối ai xuân châ mâu kăn teăng mâ tơdrăng tơbleăng, tơpui a hneăng hôp. Tung mê, tơdroăng hnê, hriâm mơ’no tơdrêng tung um tiô troăng măng Internet, tơdroăng tŏng kum tê tơmeăm pêi lo ing chiâk deăng ăm kuăn pơlê tung rơnó pơreăng châ mâu kăn tơmâng.

Kơdroh tơdroăng hnê hriâm ing Internet mê bu chiâng pêi pro châ tơƀrê a kơpong ki tơ’lêi, xua mê tơdjâk troh tơdroăng hriâm tâp ƀă hok tro kơpong pá puât. Tơdroăng tŏng kum kuăn pơlê, khu tơrŭm cheăng tê tơmeăm pêi lo ing chiâk deăng xuân tá hâi châ tơƀrê tung rơnó pơreăng kân xông tâ tú, kal hriăn plĕng troăng pêi ki châ tơƀrê.

A Sa Ly tơplôu ƀă tơbleăng