VOV4.Sêdang - Tung 2 hâi lơ 30 ƀă 31/8, hok tro khôu lâm 1 a kong pơlê Dak Nông hiăng pơxiâm tơkŭm hngêi trung hriâm hơnăm hriâm nếo 2021 – 2022 tiô troăng klâ kơtăn vâ tơniăn hbrâ mơdât pơreăng COVID-19. Hok tro châ tơdah ing bo cheăng hngêi trung, xôh pơkeăng kơdê pơreăng ƀă khăm ngăn ki tô tung châ ahdrối vâ mot tung lâm. Tâi tâng nôu pâ hok tro, hok tro, kăn ƀô̆, thái cô pơrá pêi pro kơtăng 5K.

Hok tro Dak Nông pơxiâm tơkŭm hngêi trung tung klâ kơtăn pơlê pơla

Hơnăm hriâm 2021 – 2022, lâp kong pơlê Dak Nông ai lối 182 rơpâu ngế hok tro mâu râ. Tung mê, ai 38 rơpâu ngế hok tro râ mâm non, lối 72 rơpâu hok tro râ má môi, 48 rơpâu hok tro râ má péa, vâ chê 23 rơpâu hok tro râ má pái phôh thong ƀă dâng 1 rơpâu ngế hok tro mâu tíu xiâm hnê hriâm đi đo.

Klêi kơ’nâi khu lâm 1, sap ing hâi kố, lơ 1/9, hok tro mâu lâm ki ê a Dak Nông kô pơtối tơkŭm hngêi trung tiô troăng klâ kơtăn. Krê khu râ mâm non ôh tá tơkŭm hngêi trung, bu tơdah troh lâm klêi kơ’nâi hâi lơ 5/9.

A Sa Ly tơplôu ƀă tơbleăng