VOV4.Sêdang -Hâi lơ 27/9, mâu hngêi trung hriâm a kong pơlê Dak Nông hiăng tơdah hok tro vêh hriâm nếo klêi kơ’nâi hâi khế pơkâ thế klâ ối krê pơlê pơla vâ hbrâ mơdât pơreăng COVID-19. Tiah mê, kơvâ ngăn hnê hriâm ƀă hnê mơjiâng tuăn ngoâ rơkê kong pơlê Dak Nông ăm phêp mâu hngêi trung hriâm a 4 to tơring, Dak Glong, Dak Song, Tuy Đức, Krông Nông ƀă pơlê kong kơdrâm Gia Nghĩa tơdah hok tro vêh hriâm. Drêng troh a hngêi trung, mâu vâi o athế châ séa ngăn ki tô a châ, jíu kŏng ƀă têa kơdê pơreăng. Mâu hngêi trung pôi tá tơkŭm po koh hlá cơ apoăng măng tĭng teăng amê thái cô pơkuâ lâm hnê hok tro ‘na tơdroăng ki hbrâ mơdât pơreăng dêi hngêi trung.

Mâu vâi o hok tro châ kơvâ ngăn hnê hriâm séa ngăn ki tôu a châ hdrối vâ mot tung hngêi trung

Tung pơla ối a hngêi trung, tá hok tro ƀă thái cô pơrá athế truâ kên pâng môh rơkong. Krê a tơring Čư̆ Jut, klêi kơ’nâi châ ‘nâi ai ngế yương tĭnh ƀă SARS-CoV-2 a cheăm Nam Dong a hâi lơ 26/9, kơvâ ngăn hnê hriâm ƀă hnê mơjiâng tuăn ngoâ rơkê hiăng pơtê pơtân tơdroăng ki ăm hok tro troh hngêi trung.

Katarina Nga tơplôu ƀă tơbleăng