VOV4.Xơ Đăng Rôh hôp “Hơ’lêh nếo rơkê: Tơdjêp troăng hơlâ ƀă khu mơdró kâ Việt Nam”, xua Tạp chí Kinh tế ƀă Tối tơbleăng dêi Khu xiâm pơkâ ƀă ‘no liăn cheăng tơkŭm po a kơxo lơ 15/12 a Hà Nội. A rôh hôp, mâu khu ki rơkê plĕng mơnhên tối: Hơnăm 2020, kơlo kơxô̆ ki hơ’lêh nếo rơkê plĕng dêi Việt Nam ối 42/131 to kong têa ƀă kơpong tơnêi tơníu, hơ’lêh hên khât drêng tâk 10 râ sap ing hơnăm 2015 ƀă ối tung khu 29 to kong têa ƀă kong têa cheăng kâ rơtế kơlo pêi lo liăn.

Hơnăm 2021, Việt Nam châ chêh ối má 44 klêi kơ’nâi Khu tơrŭm xúa tuăn ngoâ rơkê lâp plâi tơnêi chêh ‘na GDP tiô riân ngăn nếo dêi Việt Nam. Maluâ hiăng pêi pro châ mâu tơdroăng ki phiu ro, la hơ’lêh nếo rơkê dêi tơnêi têa ối ai hên tơdroăng ki tá hâi tơƀrê khât. Mâu kăn tối: Khu mơdró kâ dế tá hâi ai tŭm tơdroăng kal ‘na mâu troăng hơlâ pơkâ, mâu tơdroăng ki tŏng kum dêi Tơnêi têa ‘na hơ’lêh nếo rơkê, mê tá hâi châ xúa rôh ki vâ mơdêk tro má môi mâu tơdroăng ki tơ’lêi hlâu tung mơdêk hơ’lêh nếo rơkê.