VOV4.Sêdang - Hok tro lâp tơnêi têa hiăng mot tung hơnăm hriâm nếo 2021-2022. Maluâ mâu kong pơlê, pơlê kong kân pơrá hiăng mơnhên kô kơdo mơ-eăm kơdroh tah lôi ki xahpá xua pơreăng COVID-19 xông tâ tú vâ tơkŭm po roh hnê hriâm ăm i tro tơdroăng, la ga, xuân u ối hên tơdroăng ki pá puât xua tá hâi teăm ai tŭm tơmeăm khoăng hnê hriâm a mâu hngêi trung ƀă mâu hok tro.

Pơlê kong kân Hồ Chí Minh, cho tíu dế ai pơreăng COVID-19 dêi lâp tơnêi têa, khu kăn pơkuâ ƀă kơvâ cheăng ki ai tơdjâk mơnhên kô tơkŭm hnê ƀă hriâm ing troăng hyôh Internet troh tâi hriâm hneăng má 1, la tơdroăng ki pơtroh, xoăng hlá mơéa hriâm ăm mâu hok tro dế trâm pá. Tung mê, hlá mơéa hriâm lâm 1, lâm 2 ƀă lâm 6 tiô tơdroăng hriâm yăo dục phôh thong nếo, mâu tíu hnê nếo tơbleăng châ lối tơdế hlá mơ-éa troh mâu hngêi trung hriâm. Xua mê, rơtế ƀă tơdroăng ki tăng troăng xing xoăng hlá mơ-éa hriâm troh hok tro, mâu pơlê krâm, tơring ƀă mâu hngêi trung athế kum hlá mơ-éa hriâm điê̆n tưh sap ing lâm 1 troh lâm 12 ing măng Internet ăm hlo tro vâ xúa pơtân tung pơla apoăng hơnăm hriâm.

Pôa Dương Anh Đức, kăn phŏ hnê ngăn Vi ƀan pơlê kong kân Hồ Chí Minh ăm ‘nâi:

“Pơlê kong kân pơkâ thế mâu hngêi trung ‘nâi nhên rêm mâu nôu, pâ hok tro, hlê nhên tơdroăng rêh ối hok tro vâ chêh riân mâu vâi o lơ xơpá ‘na troăng mơ’no hyôh tung tơdroăng ki hriâm ing măng Internet. Sap ing mê ai troăng hơlâ pơkâ nhên tŏng kum, môi tiah: tơdjêp mâu khu ki ai hiâm mơno hơ-ui tŏng kum liăn ngân, kế tơmeăm xúa ăm hok tro, pơtroh mâu phĭu hriâm tâp, hlá mơ-éa  vâ hok tro rơbot ƀai. Mâu hok tro ki kố kô châ mơnhên tối kiêm tra ƀă tơmâng ngăn hnê tơdrêng hlối ai tơmeăm vâ hriâm tơdrêng”.

Hiăng cho hơnăm má 3 kơvâ hnê hriâm tơbleăng hnê ƀă hriâm ing troăng hyôh Ineternet tung pơla ai pơreăng COVID-19, la mâu kong pơlê pơrá tối tiah kố, ôh tá chiâng vâ tơkŭm hriâm ing troăng hyôh Internet chiâng vâ hriâm ton, xua kô tơdjâk troh ki rơkê tung hnê hriâm, ivá ƀă hiâm mơno dêi hok tro, malối cho râ mầm non ƀă râ má môi. Tơdroăng ki hok tro hriâm ing troăng hyôh Internet xuân pro pá ăm nôu, athế roê tŭm mâu kơmăi kơmok ăm tơdroăng ki hriâm in troăng hyôh Internet tung pơla pêi lo liăn chu kơdroh xua tơdjâk dêi pơreăng COVID-19.

Malối, túa pơkâ kố, tâng ôh tá rơhêng vâ tối cho ôh tá chiâng pêi pro a mâu kơpong peăng kong ngo, tíu ki tơdroăng rêh ối cheăng kâ, pơlê pơla ối trâm hên xơpá. Xua mê, hên kong pơlê pâ thế mâu kơvâ cheăng ki ai tơdjâk hriăn ngăn, kơjo kum pâk vaccine ăm mâu thái cô ƀă hok tung lâp tơnêi têa.

Pôa Vũ Đại Thắng, kăn pơkuâ ngăn Đảng ủy Quảng Bình tối mâu tơdroăng ki tơná tơná pói vâ:

“Pơreăng COVID xuân dế tâ tú, pro ôh tá tơniăn, pin nôkố dế tơbleăng tơdroăng pâk vaccine ăm tâi tâng kuăn pơlê. Pin tơmâng ngăn khât tơdroăng ki hriâm tâp dêi mâu vâi muăn hok tro tơ’lêi hlâu mê pin athế tơmiât troh tơdroăng ki ai vaccine tung hngêi trung hriâm tâp pâk ăm mâu vâi muăn hok tro, malối cho hok tro râ má pái”.

Pơreăng COVID-19 ƀă tơdroăng  ki tâ tú rơ-iêo tung hơnăm 2020 ƀă 8 khế hơnăm 2021 xuân tơdjâk troh tơdroăng ki tơbleăng ‘na hnê hriâm phôh thong nếo a hên kong pơlê, malối cho xơpá tung tơdroăng xing xoăng liăn ăm tơdroăng ki roê mâu kế tơmeăm xúa tung hriâm tâp. A rôh hôp lâp tơnêi têa mơgêi hơnăm hriâm ƀă tơbleăng hnoăng cheăng hơnăm hriâm nếo dêi kơvâ hnê hriâm ƀă hnê mơjiâng tuăn ngoâ rơkê nếo achê kố, ai mâu kong pơlê pâ thế mâu kơ koan rak ngăn séa ngăn, pơtê ‘nôi tơdroăng ki hnê hriâm tơdroăng ki nếo ƀă lâm 10.

Pôa Nguyễn Đức Trung, kăn hnê ngăn Vi ƀan hnê ngăn kong pơlê Nghệ An pâ thế:

 “Pâ thế Khu xiâm ngăn hnê hriâm ƀă hnê mơjiâng tuăn ngoâ rơkê séa ngăn, tối tơbleăng tơdroăng ƀă séa ngăn tơdroăng ki pơtê ‘nôi tơdroăng ki hnê tiô hlá mơ-éa hriâm lâm 10 sap ing hơnăm hriâm 2022-2023 troh hơnăm hriâm 2025 – 2026 ƀă péa tơdroăng. Má môi, dế nôkố xua dế tâ tú pơreăng COVID mê cho kong pơlê ki tá hâi tŭm tơdroăng ki vâ rak tơniăn liăn ngân vâ roê kơmăi kơmok, malối cho mơjiâng tơdroăng hlá mơ-éa hriâm, mê hnê ăm mâu thái cô, tơdroăng kố xuân xơpá ăm kong pơlê. Má péa, vâ rak tơniăn tơdâng tơ’mô hơnăm kố pin pơxiâm pêi pro tơdroăng ki hnê tiô hlá mơ-éa hriâm lâm 6, vâ troh 3 hơnăm nếo mê pin pêi pro tơdroăng ki hnê lâm 10 mê kô tơtro tâ, rak tơniăn rơkê, tơdâng tơ’mô tâ”.

Jâ Nguyễn Thị Quyên Thanh, kăn phŏ hnê ngăn Vi ƀan kong pơlê Vĩng Long tối tiah kố:

 ‘’Hok tro lâm 9 hơnăm kố hriâm tung tơdroăng ki dế ai pơreăng tâ tú, pro ôh tá tơniăn. Drêng pin mơ’no tối tơdroăng hriâm ki kal tơdroăng hriâm, cho tơdroăng hnê hriâm phôh thong mê vâi o hôm ai tŭm ivá ki rơkê plĕng loi tơngah ƀă pơtroh vâ chiâng pơxiâm há lơ ôh. Pin pâ thế Khu xiâm kal tơmiât nhên, mơnhên tối khât, xua tơdroăng ki hnoăng pơxúa dêi mâu vâi o hok tro ‘na ki rơkê plĕng drêng pêi pro tơdroăng hnê hriâm phôh thong nếo, tung tơdroăng ki mê kal tơmiât nhên ƀă pâ thế ƀă Kuô̆k hô̆i ‘na hơ’lêh lơ ‘mâi rơnêu tơdroăng pơkâ 51”.

‘Nâi yoh tung pơla tơnêi têa dế xơpá xua pơreăng COVID-19, hên tơdroăng ‘na troăng hơlâ pơkâ tơleăng tơdrêng, la rơhêng vâ mâu kơ koan rak ngăn, khu pơkuâ ƀă kơvâ ngăn hnê hriâm ƀă hnê mơjiâng tuăn ngoâ rơkê kong pơlê rơtế tăng túa pơkâ tơleăng ki xơpá vâ vâi o rĕng châ troh hngêi trung hriâm tâp tung mâu tíu ki tơniăn lĕm ‘na pơreăng ƀă rơtế “rêh ối tơdjuôm” ƀă pơreăng ton xŏn.

Minh Hường -  VOV1

Katarina Nga tơplôu ƀă tơbleăng