VOV4.Xơ Đăng - Troh nôkố xuân ối troh 7 rơtuh 600 rơpâu klŏng vaccine mơdât COVID-19 tung khu lêng ƀă kuăn pơlê hâi châ chêh ‘mot tung kơmăi tơdjâk troh tơdroăng ăm hộ chiếu vaccine ƀă ki pơ’lêh kơxô̆ dêi tơnêi têa. Mê cho tơdroăng tối a hneăng Hôp mơ’no tơdrêng tung hyôh Internet lâp tơnêi têa tối ‘na tơdroăng ‘’Pro krúa’’ tơdroăng chêh ‘mot tung kơmăi pâk vaccine hbrâ mơdât COVID-19 xua khu xiâm ngăn pơkeăng tơrŭm ƀă Khu xiâm Kŏng an tơkŭm po kơxo lơ 26/4, a Hà Nội.

Ki xiâm khoh chiâng ai tơdroăng nếo tối cho xúa ing mâu tíu pâk hâi châ po ngăn teăm, hâi châ ngăn tŭm mâu tơdroăng dêi mơngế ki pâk vaccine COVID-19 chêh ‘mot tung kơmăi. Tơdroăng chêh ‘mot tung kơmăi ‘na pâk vaccine hâi môi tiah má lôi cho tơdroăng mâu kơxô̆ tơdroăng kal dêi tơnêi ‘na ‘na kuăn pơlê.  Khu xiâm kŏng an tối nhên, tơdroăng chêh ‘măn dêi tơnêi têa ‘na kơxô̆ pơ’leăng mâ kuăn mơngế cho ki ngăn xiâm vâ ‘nâi ăm tơdâng mâu tơdroăng ‘na pâk vaccine hbrâ mơdât COVID-19 xuân môi tiah mâu tơdroăng ki ê dêi kuăn pơlê, pêi pro mâu tơdroăng pơ’lêh kơxô̆ dêi tơnêi têa.

Khu xiâm ngăn pơkeăng ăm ‘nâi, troh tơdroăng lôi tối tơbleăng ăm hngêi pơkeăng tung tơnêi têa nôkố ôh tá pá pêi pro tăng xếo F0, F1. Laga xuân ối thế tối tơbleăng ăm hngêi pơkeăng ƀă mơngế ing kong têa ê mot a Việt Nam.

Gương tơplôu ƀă tơbleăng