VOV4. Xơ Đăng - Tiô Tíu xiâm Hbrâ mơdât chai tamo (CDC) kong pơlê Dak Lak, hâi lơ 7/6, a kong pơlê ai môi ngế tro pơreăng Whitmore a thôn Chiềng, cheăm Ia Lốp, tơring Ea Súp. Ngế ki tro pơreăng mê cho N.T.V (Kơdrâi, kot mâ 2013, ối a thôn Chiềng, cheăm Ia Lốp, tơring Ea Súp). Hâi lơ 4/6, ngế ki mê châ rơpŏng djâ khăm a hngêi pơkeăng kân Kơpong Tây Nguyên, mot pơlât tung khoa Nhi Tổng hợp tung tơdroăng ki ối lĕm, tơngê 39 đô̆ C, a péa pâ tuăn êi kân, khăng ‘răng. Ôu kâ ôh tá lŏn. Troh hâi lơ 7/6, ngế ki mê tơngê  ki tôu troh 41 đô̆ C. Séa ngăn mơheăm yương tĭnh ƀă vi khuẩn pro chiâng pơreăng Whitmore.

Pơreăng Burkhlderia Pseudomallei pro chiâng pơreăng Whitmore. Um: Alijazeera

Klêi kơ’nâi ‘nâi ai ngế tro tâ pơreăng Whitmor, CDC Dak Lak hiăng rĕng tơbleăng tơdroăng kố ăm tíu pêi cheăng ki ai tơdjâk, tơdrêng amê hlối tơkŭm po séa ngăn tung pơlê pơla vâ hbrâ mơdât pơreăng tâ tú. Pơreăng Whitmore cho pơreăng tâ tú mơni kô tâ tú ăm ngế ki ê lơ ing mâu kuăn kiâ. Xiâm kối pro chiâng ai pơreăng cho xua pơreăng pro chiâng ai pơreăng ối tung têa ƀă tơnêi ki tro ‘mêi. Pơreăng kố mơni pro hlâ mơngế xua êi xôu, ai pơreăng tung mơheăm, tơdjâk troh klêa kliâm drêng ôh tá châ pơlât tơdrêng ƀă tro túa. Túa vi khuẩn kố gá ối rêh mơni kâi trâng ƀă hên mâu kháng sinh tiah hmâ, tung mê hệ miễn dịch dêi châ chăn ôh tá kâi mơdât vi khuẩn kố tiô túa ki tơƀrê.

A Việt Nam, ngế ki tro tâ pơreăng Whitmore apoăng châ ‘nâi a hơnăm 1925, klêi kơ’nâi tâ tú a mâu kong pơlê tung lâp tơnêi têa ƀă rế tâk tung pơla achê kố. A Dak Lak kố cho ngế ki tâ pơreăng ki apoăng châ ‘nâi.

Katarina Nga tơplôu ƀă tơbleăng