VOV4.Xơ Đăng - Sap ing khế 12/2021, drêng pơreăng tâ tú rơ-iô, ôh tá tơniăn drêng pơtối ai hên ngế tâ COVID-19, kong pơlê Dak Lak môi tuăn ƀă troăng hơlâ pơkâ ăm mâu ngế ki tâ COVID-19 a pơlê kong kơdrâm Ƀuôn Ma Thuột châ pơlât, klâ ối krê a hngêi. Vâ kơdroh iâ tơdroăng ki hâ ho a mâu tíu khăm pơlât, môi khu mâu ƀok thái pơkeăng a pơlê kong kơdrâm Ƀuôn Ma Thuột hiăng pơkâ mơjiâng khu ki tiâ mơnhên tơdrêng ing măng Internet tê kơtê ƀă kum mâu ngế F0 pơlât a hngêi.

Klêi hiăng ‘nâi tơná tro tâ COVID-19, nâ Cao Thị Thanh Phương, ối a khô̆i 2, bêng Tân Hòa préa, tô tuăn, xua tung hngêi nâ ối ai 2 ngế kuăn ối kŭn. Châ pú hmâ tơbleăng khu Tŏng kum pơlât F0 a hngêi kong pơlê Dak Lak, nâ hiăng krếo phôn kơnôm hnê mơhno, tơdroăng tơngah mê hiăng tơkâ hluâ tơdroăng tô tuăn, tơrŭm tiô  mâu tơdroăng hnê mơhno dêi khu ƀok thái pơkeăng, tơniăn tơkâ hluâ pơreăng:

‘’Á châ hlo tơná tro F0, mê á tô tuăn ƀă préa, á pâ klâ kơtăn a hngêi kơ’nâi mê á châ pú hmâ tơbleăng ăm á khu ƀok thái pơkeăng Hòa Anh pơlât F0 a hngêi. Tung khu ƀok thái pơkeăng Hòa Anh rêm ngế pêi tá hiâm mơno, rêm hâi mâu ƀok thái pơkeăng, điều dưỡng krếo phôn kơ-êng ƀă lăm pôu khăm ngăn ivá ăm á ƀă hnê tối ăm á troăng vâ ối a hngêi klâ kơtăn môi tiah lâi vâ tơniăn ăm tơná ƀă rêm ngế rơtâ tá, mâu ƀok thái pơkeăng xing xoăng ăm pơkeăng ăm á pơlât, tung tơdroăng pơlât hiăng âm tĭnh, mơnê khu ƀok thái pơkeăng Hòa Anh hiăng tŏng kum pơlât F0 a hngêi’’.

Khu pleăng hnoăng cheăng dêi ƀok thái pơkeăng Hòa Anh dế tŏng kum pơlât F0 a hngêi

Môi tiah nâ Cao Thị Thanh Phương ƀă hên ngế tro tâ pơreăng COVID-19 ki ê a Dak Lak, klêi kơ’nâi 5 hâi pơlât a hngêi ƀă tơdroăng tŏng kum dêi khu ƀok thái pơkeăng tŏng kum pơlât F0 a hngêi, jâ Trần Thị Kim Loan ối a bêng Tân An, pơlê kong kơdrâm Ƀuôn Ma Thuột hiăng khăm ngăn âm tĭnh ƀă SARS-CoV-2. Hơniâp ro xua ivá hiăng prêi lĕm tơniăn, jâ Loan mơnê khu hnê mơhno – tŏng kum, hiăng tá hiâm mơno hnê mơhno kuăn pơlê tung  plâ mâu hâi pơlât.

‘’Ing tơdroăng dêi khu tŏng kum Dak Lak ai meh Hòa Anh mê á krếo phôn tơbleăng tơdrêng ƀă châ mâu meh, mâu điều dưỡng, y tă tŏng kum teăm tơdrêng ƀă xing xoăng pơkeăng, séa ngăn rêm hâi. Klêi kơ’nâi 5 hâi cho âm tĭnh tâi tâng ƀă tơbleăng ăm peăng bêng chu vêh khăm ngăn ƀă mơnhên’’.

Khu hnê mơhno online tê kơtê ƀă tŏng kum ngế tro tâ F0 a hngêi xua ƀok thái pơkeăng Phạm Hòa Anh, nôkố dế pêi cheăng a Hngêi pơkeăng kân Thiện Hạnh, kong pơlê pơlê Dak Lak mơjiâng pro. Veăng tung khu ai 50 ngế tơrŭm cheăng mê cho mâu thái pơkeăng, ƀok thái pơkeăng a hên kong pơlê, pơlê kong kơdrâm phá tơ-ê dêi pó rơtế khu ki pleăng hnoăng cheăng a Dak Lak. Vâ kô tơniăn pêi cheăng plâ hâi plâi măng, teăm tơdrêng hnê mơhno online, khu châ xing xoăng chiâng mâu khu ối kŭn, tơtro ƀă rêm tơdroăng xiâm hnê mơhno tŏng kum F0.

Khu dêi ƀok thái pơkeăng Hòa Anh hbrâ tŭm kơƀin ô-xy ƀă mâu tơmeăm ki ê vâ tŏng kum pơlât F0 a hngêi

Pơtối mê, khu ƀok thái pơkeăng kô pơkuâ hnê mơhno, pơlât; khu điều dưỡng pơkuâ hnê mơhno ‘na troăng xôh pơkeăng kơdê pơreăng, hrik hiâm ƀă môh, rơkong, séa ngăn tơdroăng châi, chêh tối   tơdroăng tung kơmăi lơ krếo phôn drêng châi râ; khu yươk sih kô hnê mơhno troăng ôu pơkeăng; khu tơdah, khu xing xoăng pơkeăng, tơmeăm khăm pơlât ƀă hía hé.

Tiô ƀok thái pơkeăng Hòa Anh, klêi kơ’nâi vâ chê 4 khế mơjiâng, khu hiăng tŏng kum online rak ngăn, pơlât a hngêi ăm dâng 1.500 ngế F0 ƀă ôh tá ai ngế châi râ.

‘’Veăng tung tơdroăng cheăng ai hên khu ngế, ai ngế tung kơvâ khăm pơlât, ai ngế pakong kơvâ khăm pơlât pêi tơdroăng ki hnê mơhno mâu ngế tro tâ pơreăng ƀă hnê mơhno vâi ‘mot phân mêm, klêi mê mơhnhôk vâi. Má péa nếo tơdroăng kố châ hên khu ki ai tuăn hơ-ui tŏng kum môi tuăn tơlo liăn vâ kơxô̆ liăn mê rôe hên pơkeăng tâ vâ á châ kum mâu ngế tro tâ pơreăng vâ vâi kơdroh lăm rôe ƀă á xuân ai liăn vâ rôe mâu tơmeăm ki kal ki ê dêi mâu ngế ki pleăng hnoăng cheăng môi tiah têa kơxăng prôk lăm’’.

Mot hơnăm 2022, pơreăng COVID-19 xông tâ tú ó a Dak Lak; kơxô̆ mơngế tro tâ pơreăng tâk rĕng, ai hâi châ hlo lối 4.500 ngế. Nôkố kong pơlê Dak Lak ai lối 87 rơpâu ngế tro tâ pơreăng COVID-19, tung mê, krê pơlê kong kơdrâm Ƀuôn Ma Thuột ai lối 30 rơpâu ngế tro tâ pơreăng. Tung kơxô̆ lối 30 rơpâu ngế F0 kố ai dâng lối 15 rơpâu ngế dế pơlât, 98% tung kơxô̆ mê dế pơlât a hngêi.

Tiô pôa Nay Phi La, Kăn pơkuâ ngăn pơkeăng ƀă khăm pơlât kong pơlê Dak Lak tối, kơxô̆ F0 dế pơlât a hngêi a Ƀuôn Ma Thuột hiăng pro hên hngêi pơkeăng tung kong pơlê kơdroh hâ ho mơngế pơlât. Tơdroăng ki rơtế, tŏng kum dêi khu ƀok thái pơkeăng Phạm Hòa Anh cho tơdroăng ki kơnía, kum kơdroh pá puât ăm hngêi pơkeăng pơlât:

‘’Kơbong khăm pơlât dêi ƀok thái pơkeăng Hòa Anh hiăng veăng tung tôh COVID pơlê pơla ƀă xuân tŭm tơmeăm ing kơƀin ô-xy klêi mê SPO2 ƀă tá kơtong pơkeăng A, B vâ pơlât. Kố cho môi tung mâu tơdroăng mơ-eăm dêi pơlê pơla tung hbrâ mơdât pơreăng. Tiah mê kơvâ khăm pơlât ôh tá môi ngế xêh ôh. Tung la ngiâ á xuân pói vâ ƀă krếo thế mâu khu tơrŭm cheăng ƀă mâu kơbong khăm pơlât veăng ƀă kơvâ khăm pơlât tung pơlât F0 a hngêi’’.

Tung pơla pơreăng COVID-19 dế xông tâ tú ó, kô chiâng vâ tối troh tơdroăng ki veăng dêi khu thái pơkeăng, ƀok thái pơkeăng dêi khu hnê mơhno online tê kơtê tŏng kum mâu ngế F0 a hngêi cho nhuô̆m păng ‘nâng, kum mâu ngế F0 ai tíu kơnôm, loi tơngah, krá tơniăn vâ tơplâ ƀă pơreăng, ing mê kum hên tung tơdroăng hbrâ mơdât pơreăng, xuân môi tiah troh lâp lu mâu tơdroăng ki kơnâ ki le\m tro troh ƀă pơlê pơla.

Nam Trang chêh

A Sa Ly tơplôu ƀă tơbleăng