VOV4.Xơ Đăng - Ƀok thái pơkeăng Hoàng Hải Phúc, Ngế phŏ pơkuâ Tíu xiâm séa ngăn mơdât pơreăng kong pơlê Dak Lak ăm ‘nâi, mâu tơdroăng hbrâ mơdât pơreăng tơngê lo mơheăm tung kong pơlê Dak Lak trâm hên xơpá xua ôh tá ai bê trếo pơkeăng vâ xôh kơdê pơreăng a mâu tíu tâ pơreăng. Tung măng tĭng hdrối, kong pơlê Dak Lak pơtối ai 8 tíu tâ tú pơreăng a tơring Lak, pro kơxô̆ xiâm tâ pơreăng a kong pơlê tâk lối 40 tíu, ƀă lối 1 rơpâu ngế tâ pơreăng tơngê lo mơheăm.

Tiô pôa Hoàng Hải Phúc, Ngế xiâm phŏ pơkuâ Tíu xiâm séa ngăn mơdât pơreăng kong pơlê Dak Lak ƀă mâu tíu xiâm tâ pơreăng ki nếo ‘nâi kal ai hên pơkeăng vâ xôh kơdê pơreăng. Laga, nôkố a tíu pêi cheăng hiăng pa ai xếo trếo pơkeăng, Viện vệ sinh dịch tể Tây Nguyên ƀă Tíu xiâm ngăn pơkeăng pơlât xuân bú nếo ăm i iâ, ôh tá bê vâ lăm xôh lâp mâu tíu ki xiâm tâ pơreăng.

Xuân tiô pôa Hoàng Hải Phúc, vâ mơdât tâ tú pơreăng tơngê lo mơheăm tung pơla dế oh tá ai pơkeăng vâ xôh kơdê pơreăng, kơvâ ngăn pơkeăng thế tơmâng mâu khu tơrŭm cheăng khu grup ƀă mâu kăn cheăm tơring kong pơlê thế tơmâng hnê kuăn pơlê hbrâ mơdât pơreăng ƀă tơdroăng pêi pro, mơgruá lĕm hngêi trăng klông troăng, kơdê kiâ ngu ngĕng, ôa tri trôu. 

Gương tơplôu ƀă tơbleăng