VOV4.Xơ Đăng - Kong pơlê Dak Lak dế pơtối pêi pro tơdroăng pâk vaccine hbrâ mơdât pơreăng êi rơtốu krôk hneăng má 3, ƀă pơkâ xiâm châ 95% ƀă mâu ngế a pơlê pơla châ pâk vaccine tâi tâng. Pôa Nay Phi La, Kăn pơkuâ ngăn pơkeăng ƀă khăm pơlât kong pơlê Dak Lak tối ăm ‘nâi, kơxô̆ vaccine hbrâ mơdât pơreăng êi rơtốu krôk (vaccine TD) châ xing xoăng ăm tơdroăng pâk roh kố cho 743 rơpâu kung kếo.

Kăn ƀô̆ hngêi pơkeăng cheăm Čư Prao, tơring MDrak pâk vaccine TD ăm kuăn pơlê

Khu hiăng hnê mơhno hngêi pơkeăng séa ngăn, xêo kơxô̆ mơngế tá hâi châ pâk a mâu tơring, cheăm, lơ mâu kơpong ai ngế tro tâ pơreăng laga tá hâi châ pâk tŭm, tơniăn mâu ngế châ pâk tŭm 2 trum, châ pâk lối 95% a tâi tâng mâu cheăm, bêng, pơlê kân, ki rơhêng vâ tối cho kơpong hơngế hơngo, tíu pá vâ châ khăm pơlât. Kơvâ khăm pơlât xing xoăng mơngế pêi cheăng, tơmeăm khoăng xuân môi tiah mâu kăn ƀô̆ pêi cheăng pâk pơkeăng tiô pơkâ tơdroăng cheăng.

Tơdroăng pâk vaccine hbrâ mơdât pơreăng êi rơtốu krôk tung pơla vâi hdrêng sap ing 5 troh 11 hơnăm tá hâi châ pâk vaccine hbrâ mơdât COVID-19 kô châ ki xêt khât dêi pơkeăng châ péa xôh tung hbrâ mơdât pơreăng.

A Sa Ly tơplôu ƀă tơbleăng