VOV4.Xơ Đăng - Kong pơlê Dak Lak dế thăm pêi pro tơdroăng pâk vaccine hbrâ mơdât COVID-19 trum vêh pâk troh rêm cheăm, bêng, ƀă troăng lăm troh rêm kơtâu, tơgôu rêm toăng hngêi, séa ngăn rêm ngế vâ pâk ăm kuăn pơlê. Pơtối mê, sap ing kố troh tâi khế 6 kố, Dak Lak mơ-eăm pâk tâi 260 rơpâu kung kếo vaccine hbrâ mơdât COVID-19 hiăng châ xing xoăng. Kơxô̆ vaccine kố châ xúa vâ pâk trum má 3 ƀă má 4 ăm kuăn pơlê sap ing 18 hơnăm tơngi klêng, ƀă pơkâ xiâm lối 95% kuăn pơlê sap ing 18 hơnăm tơngi klêng châ pâk trum má 3; ƀă mâu ngế tíu hbrâ mơdât pơreăng, mâu ngế ai tơdroăng châ tung châ thế pâk trum má 4.

Dak Lak: Thăm rĕng pâk vaccine hbrâ mơdât COVID-19 trum ki vêh pâk

Tiô Tíu xiâm mơdât pơreăng kong pơlê Dak Lak, nôkố kơxô̆ mơngế pâk vaccine hbrâ mơdât COVID-19 trum má 3 tung kong pơlê châ lối 32%, ƀă trum má 4 châ 1,5%. Kố cho kơxô̆ ki iâ tâng pơchông ƀă pơkâ dêi Khu xiâm pơkuâ ngăn pơkeăng ƀă khăm pơlât. Pôa Hoàng Hải Phúc, Kăn phŏ pơkuâ Tíu xiâm mơdât pơreăng kong pơlê Dak Lak tối ăm ‘nâi, vâ tơdroăng pâk vaccine hbrâ mơdât COVID-19 tơniăn tro tơdroăng, tíu cheăng hiăng tơbleăng ăm Khu pơkuâ ngăn pơkeăng ƀă khăm pơlât pơcháu pơkâ nhên ăm 15 tơring, pơlê kong krâm, pơlê kong kơdrâm, tung mê, pơkâ mâu kong pơlê thế lăm rêm kơtâu, tơgôu rêm toăng hngêi, séa ngăn rêm ngế vâ pâk ăm kuăn pơlê.

‘’Ngin pơcháu pơkâ pêi vâ hngêi pơkeăng tơring tơbleăng Vi ƀan tơring pơkâ troăng pêi rơdêi ƀă rêm cheăm, rêm tíu cheăng vâ pêi pro. Ngin xing xoăng vaccine, tơring ki lâi ôh tá tơdah vaccine mê Khu hnê mơhno dêi tơring thế tơkêa ƀă Vi ƀan kong pơlê tâng lôi ai pơreăng xông tâ tú tơring ki mê thế pôu râng hnoăng cheăng.

Ngin pêi pro tơdroăng pơtâng tối tung rơ’jíu, um tơvi, pơtâng tối tơdrêng vâ kuăn pơlê hlê plĕng mê cho troăng pơkâ pêi, troăng hơlâ dêi Đảng ƀă hnoăng dêi kuăn pơlê thế veăng, xua pâk vaccine kố cho pâk vaccine hbrâ mơdât pơreăng COVID-19’’.

A Sa Ly tơplôu ƀă tơbleăng