VOV4.Xơ Đăng - Mâu cheăm tơring tung kong pơlê Dak Nông dế mơdêk rĕng pâk klêi trum má 3 vaccine hbrâ mơdât COVID-19 ăm kuăn pơlê, ƀă tiô tối hdrối kô pê klêi tung khế 3 kố. Riân troh kơxê lơ 9/3, lâp tung kong pơlê Dak Nông hiăng pâk lối 1,22 rơtuh klŏng vaccine hbrâ mơdât COVID-19 ăm kuăn pơlê. Tung mê, kong pơlê hiăng rĕng pâk klêi trum má 2 vaccine ăm mâu ngế sap 12 hơnăm troh tơngi klêng.

Ƀă trum vaccine má 3, kong pơlê hiăng pâk ăm dâng 90% kơxô̆ mơngế kơpêng 50 hơnăm ki tung châ rế pá ai trếo ki lĕm kâi mơdât pơreăng, mơngế ki pâk vaccine Vero Cell, ƀă pâk trum  pơtối châ 1/3 kơxô̆ mơngế ing 18 hơnăm tơngi klêng.

Khu xiâm ngăn pơkeăng pơlât Dak Nông ăm ‘nâi, tâng châ xo tŭm vaccine ki khu xiâm ngăn pơkeăng pơlât ăm, kong pơlê kô mơ-eăm pâk klêi trum má 3 tung khế ki mê, ƀă rĕng pâk mơdât COVID-19 ăm lối 94 rơpâu ngế vâi ‘nĕng ing 5 troh 11 hơnăm. Troh kơxo lơ 9/3, lâp tung kong pơlê Dak Nông hiăng ai 24 rơpâu 526 ngế tâ COVID-19, tung mê ki hên hiăng pơlât prêi, ai 43 ngế hlâ.

Gương tơplôu ƀă tơbleăng