VOV4. Xơ Đăng - Tiô Khu ngăn pơkeăng ƀă khăm pơlât Dak Nông, riân sap ing 6 chôu kơxo lơ 1/3 troh kơxo lơ 2/3, lâp kong pơlê hiăng ai 1.391 ngế tâ covid-19, mơdêk tâi tâng kơxô̆ ngế tâ dêi kong pơlê kố tâk troh 18.236 ngế.

Tung mê, ki hên mâu ngế ki tâ hiăng prêi lĕm, ai 39 ngế hlâ; nôkố, Dak Nông ối va chê 4.400 ngế F0 dế pơlât a hngêi, 606 ngế pơlât a tíu khăm pơlât. Krê a Gia Nghĩa tung 1 măng tĭng kố nah hiăng ai lối 1.400 ngế F0, châ dâng 1/4 tung tâi kơxô̆ ngế tâ nếo tung lâp kong pơlê.

Dak Nông vâ chê 1.400 ngế tâ Covid-19 tung môi hâi

Hlo tơdroăng pơreăng covid-19 tâ tú rơ-iêo, Vi ƀan hnê ngăn Pơlê kong kơdrâm Gia Nghĩa hiăng ai hlá mơéa pơkâ thế séa ngăn kơtăng hên tơdroăng cheăng tê mơdró a kong pơlê. Mâu tíu ki tơkŭm khôp pôi tá ăm ối tơkŭm luâ 10 ngế tung môi to hngêi. Tơdroăng pêi cheăng tơkŭm tung hngêi, a gong athế rak tơniăn tâi tâng mâu ngế ki veăng hiăng pâk 2 trum vaccine lơ hiăng pơlât prêi covid-19 tung pơla 6 khế ƀă pêi pro kơtăng 5K.

Katarina Nga tơplôu [ă tơbleăng