VOV4.Xơ Đăng - Rơtế ƀă mâu kong pơlê tung kơpong Tây Nguyên, pơreăng tơngê lo mơheăm a Gia Lai xuân dế xông tâ tú ó. Drêng ai tơdroăng mê, kơvâ khăm pơlât dêi kong pơlê hiăng pêi pro hên troăng vâ hbrâ mơdât pơreăng. Nôkố pơreăng tơngê lo mơheăm hiăng xông tâ tú râ ó a 16/17 tơring, pơlê kong krâm, pơlê kong kơdrâm dêi kong pơlê Gia Lai ƀă 308 ngế tro tâ, tâk 57% tâng pơchông ƀă roh kố hơnăm nah.

Ƀok thái pơkeăng a Tíu xiâm khăm pơlât pơlê kong kơdrâm Plei Ku dế khăm ƀă pơlât ăm mâu ngế tro tâ pơreăng tơngê lo mơheăm

Mâu tơring ai kơxô̆ ngế tro tâ pơreăng tơngê lo mơheăm hên má môi cho Ia Grai, Ia Pa, Čư̆ Prông, Krông Pa, Čư̆ Pưh, Plei Ku, Đăk Đoa ƀă 112 tíu pơreăng xông tâ tú. Pôa Đinh Hà Nam, Kăn phŏ pơkuâ ngăn pơkeăng ƀă khăm pơlât kong pơlê Gia Lai tối ăm ‘nâi, pơreăng tơngê lo mơheăm kô xông tâ tú ó tung la ngiâ, kơvâ khăm pơlât kong pơlê dế pơtối thăm kơdê tri trôu a mâu kơpong ai pơreăng, tơkŭm po lĕm tro tơdroăng tơdah, pơlât mâu ngế tro tâ pơreăng vâ kơdroh mâu ngế tơngê lo mơheăm tung pơlê pơla.

A Sa Ly tơplôu ƀă tơbleăng