VOV4. Xơ Đăng - Hâi lơ 26/4, kong pơlê Gia Lai tơbleăng pâk vaccine COVID-19 rôh má 1 ăm 39.400 ngế vâi hdrêng sap ing 5 troh pá xôp 12 hơnăm. Tiô tíu xiâm séa ngăn hbrâ mơdât châi tamo Gia Lai, túa pơkâ dêi rôh pâk vaccine kố cho pâk ƀă tơdroăng ki pâk rĕng, tơniăn tơƀrê ƀă tơniăn má môi ăm vâi hdrêng. Xua mê, mâu tơring, cheăm mơhnhôk hên hĭn khu cheăng ‘na khăm pơlât, kơmăi kơmok, kế tơmeăm xúa ki kal, kơjo ăm vâi hdrêng; mâu tíu khăm pơlât, ai mâu hngêi trung hriâm châ pro tíu pâk.

Klêi kơ’nâi pơlê kong kơdrâm Plei Ku, sap ing hâi lơ 28/4 troh hdrối hâi lơ 8/8, tơdroăng ki pâk vaccine hbrâ mơdât pơreăng COVID-19 ăm vâi hdrêng sap ing 5 troh pá xôp 12 hơnăm, kô châ tơkŭm pâk a 4 to tơring ki e cho Čư̆ Sê, tơring Đăk Đoa, Pơlê kong krâm Ayun Pa ƀă pơlê kong krâm An Khê.